Nongstoiñ, Naiwieng, 26: Ka Rwiang Wildlife & Environmental Protection Association (RWEPA) ka kynhun jong ki khatwei tylli ki shnong kiba don ha ka thaiñ Rwiang ba kynthup naduh Rwiang, Tiniang, Kriangrin, Mawruksoiñ, Thiepjaphlang, Tumtum, Patharkhang, Seiñduli, Shilliangrynñiaw, Tlon bad Umshynrut, ka la mana tyngeh ba ym bit ban siat pynïap ïa ki mrad ki mreng kum ki skei, ki sniang khlaw bad baroh ki jait mrad bad kumjuh ruh ïa ki sim ki doh bad ki jait syiar khlaw kiba don ha katei ka thaiñ.
La khang pyrshah ruh ban pynïap pathar ïa ki don um doh wah da kaba siat bom, khang jar, wieh da ki kynja dawai bih bad kiwei kiwei ha baroh ki wah kiba don sawdong jong kitei ki shnong.
U Bah W.Thongni President katei ka synjuk, u la ïathuh ba katei ka synjuk ka la trei kam la kumba hynriew snem tam haduh mynta. U la ong ba ki nongkitkam bad ki dkhot jong katei ka synjuk ki ju peitngor bha ïoh lehse ki don ki briew kiba rung ha ki khlaw ki btap kiba thmu ban leit siat mrad.
Utei u nongïalam u la ïathuh ruh ba na ka liang ka synjuk ka kwah ba ki nongshong shnong kin ïatreilang, khnang ba yn lah ban khanglad ïa ki riew shim kabu. U la ong ba ka synjuk ka kyntu ruh ïa kito ki nongshong shnong kiba dei ki trai jong ki khlaw ki btap ha katei ka thaiñ, ba kin ïaleh katba lah ban ym pom pathar ïa ki khlaw ki btap khamtam eh ba kin kiar katba lah na ka jingthang rnga namar ka ktah haduh katta katta ïa ka mariang.
U la ong ruh ba ka synjuk ka kyntu ba lada ki kwah ban pom dieng ruh, ki dei ban da bishar bha kiba kum kino ki jait dieng kiba la long ban pom, ym ban shu pynkyllon naphang ïa ki dieng kiba dang rit ruh, khnang ba ki mrad ki mreng bad ki sim ki doh kin dang ïoh jaka ban rieh bad ban shong ban sah. Ka synjuk ka maham tyngeh ba lada lap ïa kino kino ki briew kiba pynkheiñ bad leh pyrshah, kan aiti beit ha ki bor ka aiñ ba kan leh ïa kaba donkam.
