Shillong, Naiwieng 26 : Ki nongïalehkai Roll Ball ka jylla Meghalaya ki la leit ban ïashim bynta ha ka jingïalehkai Ek Bharat Shreshtha Bharat National Senior Championship kaba la pynïaid da ka Sorkar Pdeng bad ka Roll Ball Federation of India kaban sdang naduh ka 27 tarik haduh 30 tarik mynta u Naiwieng 2022 ha Pune, Maharashtra. Ka Meghalaya team ka ngat lang ha kajuh ka group ryngkat ka Uttar Pradesh bad ka Arunachal Pradesh.
Ha kane ka Championship, ka Zone A kan long ha jylla Pune, Maharashtra, Zone B kan long ha jylla Goa bad Final kan long ha Delhi. Ha kane ka jingïalehkai, kin don 24 tylli ki jylla kiban ïashim bynta ïa kaba la phiah ha ki ar bad lai tylli ki jylla kiban ïakhun mar kylliang.
Ki nongïalehkai kiban sa ïahim bynta ba ka Meghalaya Roll Ball Association ka la jied ki kynthup u Kordor Pyrbot (East Khasi Hills), Rimioo Suchiang (West Jaiñtia Hills) bad u Caldy Nongsiang (West Khasi Hills)
Na ka liang u Bah Rantin Lakadong MDC, ka Laitumkhrah-Mali Constituency u la ai ka jingkitbok kitrwiang ïa kine ki samla ka jylla kiban leit mihkhmat sha katei ka jingïalehkai ba kin ïoh ban kheit ïa u soh jong ka jingjop.
Ha ka jingkitbok kitrwiang la sakhi lang da ki dkhot bad nongkitkam ka Meghalaya Roll Ball Association, u Bah Suklang Dkhar uba dei u General Secretary, Bah Kordor Pyrbot, Bah Joshua Sohtun, Bah Cyprian Dkhar bad u Bah Seiborlang Jaktung.
