Shillong, Ïaïong 07: “Ngi kloi ban rah wait rah stieh bad ban long Gang na ka bynta ka ri bad jaidbynriew”, la ong u Bah Donbok Dkhar, President ka Hynñiewtrep Intergrated Territorial Organisation (HITA) ha ka jingrakhe dap shi snem ka Seng, kaba la long ha ka sngi Balang ha ïingdorbar Hall jong ka Jaiaw Shyiap Lum Pyllon.
U Bah Donbok u la kdew ïa ki nongrim ba la seng ïa ka HITO bad kawei na ki nongrim ka long ban pynim bad pynkhlaiñ biang ïa ka jingsynshar trai ri trai muluk, khnang ban lah ban ïaleh pyrshah ïa ka jingthombor ki bor kiba nabar.
U la ong ruh ba ki dkot jong ka Seng kidei kiba la kloi ban aiti ïalade ban ïaleh pyrshah ïa kino kino ki jingthombor da ki bor kiba na shabar.
U la ong ka kyrteng jong ka Seng ka long ruh ban lum ban lang ïa ki para Samla bad ïa ki para ri ban ïa long lang kawei bad ïatylli ban ïaleh pyrshah ïa ki mynder ri, nangta ïa ka jingthombor ki bor sorkar, ban ïaleh pyrshah ïa ki jingdih ba sniew bad kiwei kiwei.
U Kongsan ha kane ka jingrakhe dap snem, udei u Acting Syiem ka Hima Mylliem, u Pa’iem Ainam Syiem. U Myntri ka Hima, u Bah Shanbor Sohtun, u la long u Symbud Kongsan bad u Bah Powell Sohkhlet, General Secretary ka Shillong Press Club, u la long u Kongsan Kyrpang.
U Bah Shanbor ha ka jingkren jong u, u la ïaroh ïa ka seng HITO kaba tang hapoh shi snem ka la trei bun ki kam na ka bynta ka ri bad ka jaidbynriew. U la ong ruh ba ki don ki kam ba kane ka Seng ka la trei kiba la kham palat ïa ka jingtrei kiwei pat ki Seng kiba la don slem. U la pynpaw pat ka jingsngewkhia ba ki don ki jait Seng kiba la seng tang da ki saw ne san ngut ki dkhot tang ban ïph leit dawa pisa.
U Bah Powell ha ka jingkren jong u, u la ong ba ka jingmih ki Sengbhalang ka pyni ba ka don kaei kaei ka jingbym ïaid beit ha synshar ka khadar bad ka jingbymshngaiñ ha ka imlang sahlang bad ka jingma ïa ka ri bad jaidbynriew. U la ong ruh ba ka jingmih bun ki Seng kam dei kaba bakla, hynrei ka jingdon bun ki seng, ki lama bad ki mat treikam kam dei pat ban pynïapait ïa ka ri bad ka jaidbynriew.
Ha kane ka jingrakhe ka pynshongkhia da ki jingrwai bad jingshad tynrai . Ka jingpynkup burom ïa ki nongseng jong ka Seng, ki dkhot ka Seng kiba la wanrah nam rah burom bad kumjuh ruh ka jingot cake kum ka dak ban leh kmen ha kane ka sngi.
Ha kane ka jingrakhe la ïadon lang ruh u Bah David Laitphlang, President ka Shillong Press Club.
