Shillong, Ïaiong 07 : Ka National People’s Youth Front (NPYF) kaba dei ka seng ki samla NPP ha ka sngi Palei ka la ong ba ki sngew sarong haduh katta katta ba ki don ïa u Myntri Rangbah ka jylla uba nud ban ïaid shakhmat ban pynbeit noh ïa u pud u sam hadien 50 tylli ki snem ba la shu ieh kumto.
Haba kren bad ki lad pathai khubor, u President ka NPYF, Bah Kitborlang Nongrem u la ong, “Ngi ïohi jingkynthoh jong u Dr. Mukul Sangma pyrshah ïa u Myntri Rangbah jongngi (Conrad Sangma),ba u dei uba shu kohnguh beit ïa kino kino ki kam. Hynrei ngi sniewbok pat mynshwa ba ngi don ïa u Myntri Rangbah uba shu ong em lut ïa baroh ki jaitkam naduh ka ILP haduh ka jingpynbeit pud pynbeit sam bad dei na kane ka daw kam shym don kano kano ka jingseisoh.”
Shuh shuh u la ong ruh ba ha kiwei ki sorkar ba la dep ym pat ju don satia ki Myntri Rangbah kiba nud ban shimkhia ban ïakren ïa ka ishu pynbeit pud wat tang para Myntri Rangbah.
“Ha ka por ba synshar ka Congress, ha Assam ruh synshar kajuh ka party bad ha Delhi ruh synshar ka Congress (UPA). Jingshisha naduh kato ka por la dei ban pynbeit hynrei kim don mon. Hynrei mynta pat ngi ïohi ba ka jingïasoi kam dei shuh ka jingïasoi tang hapdeng para Myntri Rangbah jong ki ar tylli ki jylla hynrei ka la dei ka jingïasoi haduh sorkar India ha ryngkat ka jingdonlang u Myntri Kampohïing ka Ri, u Amit Shah,” la bynrap biang u Bah Nongrem.
U ong ruh ba dei tang u Conrad Sangma uba la lah ban pynkohnguh ym tang ïa u Myntri Rangbah ka Assam hynrei haduh u Myntri ka tnad Kampohïing ka Ri.
Ha kajuh ka por, na ka liang ka NPYF ka pynpaw ruh ka jingkyrmen ba ka jingïakren bad ka jingpynbeit noh na ka bynta ki hynriew tylli kiwei pat ki jaka ba don jingiakajia hapdeng ka Meghalaya – Assam ruh yn dup lah ban pynbeit noh mardor.
Ka NPYF ka pynpaw ruh ia ka jinglyngoh halor ka jingshimkhia jong utei u nongialam ka Trinamool Congress ia ka ishu khappud hadien ba um don shuh ha ka bor.
