Kynthoh u Dr Mukul Sba shu pynbeit jubor ïa u pud khlem da pynshisha ïaki dulir

Nongpoh, Ïaiong 07: U Myntri Rangbah barim ka Jylla Dr Mukul Sangma ula kynnoh ba ka Sorkar Meghalaya Democratic Alliance (MDA) ba ïalam da ka National Peoples Party (NPP) kala shu pynbeit jubor ïa ka jingiakajia pud khlem da pynshisha ïa ki jaka puta kat kum ki dulir.
Kane ka jingkynnoh kala mih hadien ka jingleit jurip ïa ki shnong khappud ha Maikhuli, Ri-Bhoi District hynnin ka sngi balang ban iakynduh ïa ki nongshongshnong bad ban tip ïa ka jinglong jingman jong ki paidbah hadien ba ka Sorkar Jylla Assam bad Meghalaya, kila dep ban soi ïa ka MoU.
U Dr Mukul Sangma uba dei u Nongïalam ka All India Trinamool Congress (AITC) ula hiar sha ka Shnong Mawiong bad Maikhuli hadien ka jingmih ka jingpyrshah jong ki paidbah ïa ka soskular khamtam ïa ka jingaiti ïa ki 9 tylli ki Shnong ka Jylla Meghalaya sha Assam ba kynthup ïa ki shnong ki bym don hapdeng ka jingiakajia pud.
Naka liang u Dr. Mukul Sangma u la ïakynduh ïaki paidbah naduh ki nongïalam shnong ban ïa thir ïa tai bad ban tip ïaka jingshisha naduh tynrai halor ka huri hura bad ka kynrum kynram kaba la mih naka jingpynbeit pud bad bun naki paidbah bad ki nongïalam shnong kim hun satia ïaka rai jong ka sorkar da kaba kynnoh ruh ba ka dei tang ka rai kyrkieh jong ka sorkar bala shu pynbeit jubor ïa u pud u sam ka jylla khlem da kheiñ ïaka jingsngew jong ki paidbah bad khlem da pynshisha ïaki kot ki sla jong ki It ki Hima bad ki dulir kumba kitei ki shnong kiba la shah pynngat haka Assam ki dei kiba hap haka Hima Mylliem.
Ha katei ka sngi la sakhi ruh da ka jingdonlang u Bah R Kharbihkhiew Aadditional Deputy Commissioner ka Ri-Bhoi District, ki nongïalam shnong, ki nongïalam jong ka Garo Student Union, Ri Bhoi Regional Unit, All Garo Mahila bad kiwei kiwei.
Haba kren sha ki nongthoh khubor mynta ka sngi hadien ka jingkynduh bad ki nongïalam shnong bad ki paidbah U Dr Mukul Sangma u la pynpaw ka jingsngewkhia halor ka kynrum ka kynram kaba la mih hadien ka jingsoi ïaka MoU hapdeng ki ar jylla bad ka daw kaba la pynlong ïa u ban leit sha ki shnong khappud mynta ka sngi ka long ban tip ïaka jingshisha halor ka jingtreikam jong ka Regional Committee kiba la thung da ka sorkar ban pynbeit noh ïa u pud u sam bad kumba la tip shai ba kitei ki shnong bad ki jaka ki hap hapoh ka jingsynshar jong ka Hima Mylliem kaba sngew lyngngoh pat kumno ki tei ki shnong la pynngat sha Assam bad mano bala aibor ïaka sorkar ban aiti ïaka khyndew ka shyïap sha Assam khlem ka jingmynjur jong ka Hima namar ka sorkar kam don jaka ha kitei ki thaiñ bad kim dei ki jaka sorkar.
U la ong ruh ba haka por ka jingsynshar jong u ba u la shimti kum u Myntri Rangbah ka jylla kim shym la kyrkieh ban pynbeit ïa u pud u sam namar ki dang lum thup ïa baroh ki kot ki sla bad ki jingpynshisha naduh ka por ka jingïoh ïaka jylla ba pura bad la dep ruh ban aiti ïaki kot ki sla sha ka sorkar ha u snem 2011 ba ngim dei ban duh ïaki jaka bad ki shnong kiba dei ban long trai da ka jylla.
“Ka long kaba sngew thamula ban tip ba ka jingpynbeit pud hapdeng ka jylla Meghalaya bad Assam ka long mar 50-50 ha kaba ka jaka ka don kumba 36 square km haki 6 jaka ki jaka bala pynbeit haka sien kaba nyngkong, hynrei haba peit ïaka MoU bala ïasoi hapdeng ka jylla Meghalaya bad Assam ka jingïasam jaka ka long mar 18 square km ka jaka, da kaba buh jingkylli ruh hato kane ka dei ka rukom pynbeit pud? Bad la tip shai ruh ba na katei ka jingpynbeit pud ka Assam ka dei kaba myntoi bad ka kmen namar u Myntri Rangbah ka jylla Meghalaya u dei u ñiangkohnguh jong ka Assam, namar kata ki kyrkieh bad pynbeit jubor ïa u pud u sam khlem da pynshisha ïaki jaka puta” la ong u Dr Mukul.
Naka liang u Dr Mukul Sangma u la ong ruh ba kam dei ka kamram ban pynsngewbha ïano ïano halor ka jingpynbeit ïa u pud u sam hynrei ba ki paidbah kin ïoh ïaka hok da kaba pynthikna ruh ba kitei ki jaka ki dei hapoh ka jingpeit jingkhmih jong ka Hima bad donkam ban ïasyllok bad ban pynshisha ïaki kot ki sla kumba la lap ruh ba wat ki shnong ki bym don kano kano ka jingkajia pud la shu pynngat noh sha Assam kaba la buh pat ïaki paidbah hapdeng ka jingdum kaba khraw bad naka liang jong u, u la dep ruh ban buh jingkylli sha ka sorkar ba kane ka rukom pynbeit pud ka dei kaba bakla, u la bynrap.