Shillong, Ïaiong 07: Ka jingpynslem jong ka Sorkar Jylla ban pynshitom ïa u Executive Engineer (EE) ka Tnad Public Works Department (Building) ba kyrsum ha ki kam saiñ pyrthei, kala pynkha mynta ïa ki jingkynnoh ba ka Sorkar ka leh shiliang khmat bad pyndonkam bakla ïa ka bor.
Ki Nongïalam jong ki seng saiñ pyrthei bapher bapher kila buh dak jingkylli halor ka jingsngap jar jar jong ka Sorkar ban pynshitom ïa une u Ophisar ka Sorkar Jylla.
“Ka Sorkar Jylla ka hap ban leh eiei halor kane ka kam. Hynrei balei ka sngap jar jar bad balei ba ka pynslem?. Hato ka dei tang namar ba uwei u Engineer ka Tnad PWD un aireng na ka ticket jong ka NPP” ong uwei u Nongïalam saiñ pyrthei na North Shillong uba la kyrpad ban buhrieh kyrteng.
Uwei pat u Nongïalam saiñ pyrthei ula kdew ba une u Executive Engineer u dang ïai bteng ban trei kum u shakri sorkar bad pyntrei ruh ïa ki kam bapher bapher ka Sorkar watla ka NPP kala dep ban pynbna ïa u kum u kyrtong ha ka elekshon MLA 2023.
“Kane ka jingleh ka Sorkar ka pyni ïa ka jingleh shiliang bad pyndonkam bakla ïaka bor” kila ong.
Haba kylli, u Symbud Myntri Rangbah ka Jylla ba khmih ïa ka Tnad PWD Bah Prestone Tynsong ula pyntip ba une u Executive Engineer ka Tnad PWD (Building) Bah Ransom Sutnga ula ai jubab dang shen ïa ka showcause notice ba pan ïa ka jingpynshai halor ka jingiadon bynta jong u ha ka kam saiñ pyrthei.
U Bah Prestone u pyntip ba ka Sorkar kan sa leh ïa kaei kaba donkam kat kum ka service rule.
Ha ka Dorbar Mang tyngka ba kut dang shen, u MLA ka AITC na Rangsakona Zenith Sangma ula wanrah ïa ka Zero Hour Notice ba dawa ïa ka Sorkar ban pynshitom ïa u Bah Ransom namar ka jingpynkheiñ ïa ka Meghalaya Service Conduct Rules, 2019.
Haba sot ïa ka kot khubor, u Zenith ula ong ba u Bah Ransom uba dei u Executive Engineer ka PWD (Building) bad Dr WR Kharkukhi uba dei u MP ka Rajya Sabha bad President ka NPP, kila pynlong dang shen ïa ka jingïalang jong ka party ha North Shillong Constituency.
