Plie u Myntri Rangbah da ka Solar Power Energy ha Umsawnongkharai Health and Wellness Centre

Nongpoh, ïaïong 07: Na ka bynta ban pynsuk ïa ki jaka ai jingsumar hapoh ka jylla ba kin lah ban ai ka jingshakri kaba paka ha kaba ïa dei ban kyntiew ïa ka koit ka khiah ki paidbah, u Myntri Rangbah ka jylla, u Conrad K. Sangma mynta ka sngi u la wan ban plie ïa ka Solar Power Energy ha Umsawnongkharai Health and Welness Centre khnang ba katei ka jaka ai jingsumar kan nym shah ktah ka jingshakri ïa ki paidbah ha ka pang ka shitom na ka daw ka jingthud jong ka bording ilektrik.
Kum ban pynpaw paidbah, kane ka Solar Power Energy Lane kata ka ‘sustainable energy solution’ la wan ban buh ha Umsawnongkharai Health and Wellness Centre, ka dei ka jingïatrei lang ka sorkar jylla bad kawei ka Kompani ba la tip kum ka SELCO Foundation na ka jylla Assam.
Kumba la pynpaw ha kane ka sngi, ka jingthmu hi ban buh ïa kine ki ‘Sustainable Energy Solution’ ha katei ka jaka ai jingsumar ka long ban pynsuk ïa ki nongtrei ka tnad ka koit ka khiah ba kin nym shah ktah na ka jingthud ka bording bad khamtam kano kano ka jaka ai jingsumar ka donkam ban don beit ka bording ba bun ki dawai la hap ban buh ha kita ki jaka ba hap ban pyndaithah ïa ki dawai ba la tip kum kita ki Vaccine Storage kaba donkam beit ïa ka bording ilektrik.
Haba wan plie ruh ïa kane ka Solar Power Energy ha katei ka jaka ai jingsumar, nalor u Myntri Rangbah ka jylla, u Conrad K. Sangma uba la long u kongsan bad la sakhi ruh ha kane ka sngi da ka jingdon lang u MLA ka Umsning, u Bah Jason S. Mawlong, u Deputy Commissioner ka Ri Bhoi, u Arpit Upadhyaya, u R. Kumar, Mission Director ka National Health Mission, D. Ditismita Chowbay, CEO ka AIC SELCO Foundation, ka Dr. M. Syiemlieh, District Medical & Health Officer ka Ri Bhoi, bad la ai mynsiem ruh da ka jingdon lang ki nongtrei ka tnad ka koit ka khiah, ki nongtrei ASHA bad ki paidbah katei ka thaiñ.
Haba kren ha kane ka sngi kum u kongsan, u Myntri Rangbah ka jylla, u Conrad K. Sangma u la pynpaw ka jingkmen ban ioh ban plie ïa kane ka Solar Power Energy ha kane ka jaka ai jingsumar bad ha kajuh ka por u ai khublei kyrpang naduh ki nongtrei ka tnad ka koit ka khiah bad kumjuh ruh ïa ka SELCO Foundation ba dei da ka jingïatrei ryngkat la lah ban buh ïa kane ka Soler Power Energy ban ai ka jingmyntoi ïa ki nongtrei ka tnad ka koit ka khiah ba kin nym shah ktah na ka jingthud ka bording ilektrik kaba la ju jia khah khah khamtam ha ki shnong Nongkyndong.
U la ong ruh ba ka sorkar ka pynpaw ruh ka jingsngewkmen ba da ka jingïatrei lang ka SELCO Foundation kan sa buh ruh sha 100 tylli ki Power Energy ha ki jaka ai jingsumar ha ka jylla kiba dei ha ki bynta jong ki shnong nongkyndong bad ka daw hi ka long ban ïarap ïa ki nongtrei ka tnad ka koit ka khiah ba kin nym shah ktah ha ka jingshakri ne ka jingtrei kaba ha ki jaka ai jingsumar ka bording ilektrik ka long kaba donkam khamtam ban buh ïa ki dawai ha kita ki Vaccine Storage.
“Ka sorkar jylla ruh ka kham phai khmat sha ka tnad ka koit ka khiah hapoh ka jylla bad na ka liang ka sorkar ka la mang bun bha ka pisa na ka bynta ban kyntiew ïa ka koit ka khiah ki paidbah ba ka jingthmu hi ka long ban kyntiew ïa ka koit ka khiah ki paidbah khamtam ha ki shnong nongkyndong ka jylla” ong u Conrad K. Sangma, Myntri rangbah ka jylla Meghalaya, bad bynrap ruh da kaba ong ba ka sorkar ka pynpaw ruh ka jingsngewnguh ïa ki nongtrei ka tnad ka koit ka khiah bad kynthup ruh ki nongtrei ASHA ba wat la ki ioh ka jingsiew ka barit bad ha kine ki snem ba la leit noh ba ngi ïa khun ïa ka khlam COVID-19 ngi la jop ïa kane ka khlam kaba dei na ka daw ka jingïatrei lang na baroh ki liang” u la bynrap.
Shuh shuh, kumba mynta ka sngi la rakhe ïa kata ka World Health Day, u Myntri Rangbah ka jylla u la buh ruh ka jingkyrpad sha baroh ki nongtrei ka tnad ka koit ka khiah bad kumjuh ruh ïa ki paidbah ban gin dang don kata ka mynsiem jong ka jingïatrei lang na ka bynta ban kyntiew shuh shuh ïa ka koit ka khiah ki paidbah bad lyngba ka jingïatrei lang na baroh ki liang ngin dang lah shuh shuh ban ai ka jingshakri kabab ha tam na ka bynta kiba pang ba shitom bad ruh ban rad dyngkhong ïa ka jingpang jingshitom hapoh ka jylla, u la bynrap shuh shuh.