Pynlong ka skul Umeit SS ïaka School Nursery Yojana ban hikai ïaki khynnah skul ban ïeid ïaka mariang

Nongpoh, Ïaiong 07: Shibynta ban hikai ïaki khynnah skul bad ban pynrung ïaka mynsiem ieid mariang bad ban thung jingthung, ka skul Umeit Secondary School ha Ri-Bhoi mynta ka sngi kala pynlong da ka prokram ai jinghikai shibynta ka jingrakhe ïaka World Health Day lyngba ka School Nursery Yojana bad ka Kitchen Garden ïaki khynnah skul.
Ïa katei ka prokram ba kyrpang la pynlong ha kper bad phyllaw jong katei ka skul ha kaba u Bah R Kharbuki MDC ka Umroi u la shim bynta kum u kongsan haka jingdonlang u Bah S Mawlong Ranger ka tnad Forest Nongsder Range kum u symbud kongsan, u Bah Dapsuk Kharkrang kum u Resource Person, D Kharbani Principal ka Umeit Secondary School, ki ophisar naka tnad Forest, ki nongïalam shnong lem bad ki nonghikai bad khynnah skul jong katei ka skul.
Naka liang u Bah D Kharkrang kum u nongkren ha katei ka sngi u la pynpaw ka jingsngewkmen kaba khraw ba katei ka skul kala shim ïaka sienjam ban pynlong kum katei ka jait prokram naka bynta ban ai jinghikai ïaki khynnah skul nalor ka kot pule jong ki haki kamra klas ba kidei ruh ban tip ban pynneh pynsah bad ban ïeid ïaka mei mariang bad ruh ban ieid ban thung ban tep ban sumar ïaka mei mariang kumba bun naki briew kila pynjot bad pynduh ïaka spah jong ka mei mairiang da kaba pom pathar ïaki dieng ki siej bad pyniap pathar ïaki jait mrad bad ki jingthaw ba im kiba u Blei u la thaw ha kane ka sla pyrthei.
U la ong ruh ba ngi don ka jingkyrmen kaba skhem ba ha kine ki snem ban wan, ngin ioh ruh ki jhur ba khlem dawai da kaba ngin pyrshang ban thung ïaki jait jhur haki phyllaw bad ki rud iing ban ioh ban bam ban lait pat ban thied naki jhur na iew kiba pyndonkam dawai da kaba pynshlur ruh ïaki man la ki skul ba kin don ki kynja kper ban thung ïaki jait jingthung khamtam ki jhur.
Katei ka prokram ka long ruh kaba ai jingmyntoi ïaki khynnah bad lyngba kum katei ka jait prokram kan pynjan ïaki khynnah haka jingïadei bad ka mariang bad kane hi kan long pat ka jinghikai ban pynneh pynsah ïaka mariang ha kaba ha katei ka sngi la pynlong ruh ka jingthung ïa jait jhur ha phyllaw jong ka skul bala tip kum ka Kitchen Garden ban ioh ki jhur ba khlem dawai.
Naka liang u Bah S Mawlong Ranger ka tnad Forest u la ong ba katei ka skul kan ioh kumba 1000 tylli ki symbai dieng ban thung haki sawdong jong katei ka skul naka bynta ba pynjyrngam bad ban ioh ka mariang kaba khuid bala shim bynta ruh da ki khynnah skul jong katei ka skul.