Mawkyrwat, Ïaïong, 07: Ka Khasi Students’ Union (KSU) jong ka Mawkyllut Unit ha ka janmiet jong ka 5 tarik u Ïaïong, 2022 ka la ïoh ban leit ai mynsiem ryngkat ka jingpynkup burom ïa ka samla Ridondor Lyngdoh na ka shnong Mawkyrwat, South West Khasi Hills District namar ki kam ba shlur ba ka ka la leh.
Katkum ka jingïathuh la ong ba ka kam shlur ba kane ka khynnah samla ka la leh ka long ka la ïoh ban pylliat im ïa uwei u khynnah uba kyrteng u Didimos Shylla na ka shnong Phlangkynshi haba une u khynnah u la jan ngam jyllop ha ka por ba u dang jngi ha kawei ka wah ka Photumnew ha ka 26 tarik u Lber, 2022 bad kane ka jingjia ka dei ha ka por kum 12 baje ei ei shiteng sngi.
Kane ka khynnah samla mar sien ïohi ba utei u khynnah u la sdang ban ngam, wut wut khlem da ‘tieng bad khlem da kheiñ ïa ka ma lade ka la leit ban jngi bad ban ïarap khnang ban ïoh ban sei ïa u napoh um bad da ka jingïoh ban ïarap ba kyrkih, une u khynnah u la lait im noh.
Lah ban pynpaw ruh ba kane ka samla Ridondor Lyngdoh ka dei kaba shong ha ka klass IX ha ka Jingïaseng Kynthei Mawkyrwat Presbytery Higher Secondary School, Mawkyrwat, South West Khasi Hills District.
Ha kaba ïa dei bad kane ka kam, na ka liang ka KSU Mawkyllut Unit ha ka jingleit ban ïa kynduh markhmat bad kane ka samla Ridondor Lyngdoh, la lap ba kane ka samla ka wan na ka longïing ba suk. Hynrei kaba pynkmen ïa ki dkhot ka seng ka long ba wat hapdeng jong ka jingduk, kane ka khynnah samla ka don shisha ïa ka mynsiem ban ïarap lem ïa kiwei ki para mynsiem la ka long ha kano kano ka bynta.
Ka seng namarkata, ka ai khublei kitbok kitrwiang ïa ka, ba kan nang ïoh ka met ba koit ba khiah bad ka mynsiem ba shlur jong kane kan ïai don ha manla ka jingim.
