Mawkyrwat, Ïaïong, 07: Ki nongïalam jong ka Federation of Khasi Jaiñtia & Garo People (FKJGP) ki la phah da ka shithi ha ki nongïalam ba hakhmat jong ka FKJGP Mawkyrwat Circle ba ki la dep ban ieh-noh ban long ki dkhot ba pura jong ka seng.
Ha ka kyrwoh khubor ba la phah, la ong ba ka jingieh noh kam kum ki nongïalam ka dei na u Stortonbin K. Kharai uba bat kum u Assistant Organising Secretary jong ka FKJGP, South West Khasi Hills District bad kumjuh ruh na ka liang u President bad Secretary jong ka FKJGP Mawkyrwat Unit, bad kumjuh ruh u President ka FKJGP Pyndensakwang Unit.
Katkum ka jingïathuh jong ki ka long ba ka jingiehnoh ban long ki nongïalam jong ka FKJGP ka dei ba tlot palat ki nongïalam ba ha khmat jong ka FKJGP, South West Khasi Hills District bad ka don ka jingbym ïa sngewthuh hapdeng jong ki dkhot la ha kino kino ki kam. “La kham slem nga don ha ka seng, naduh ka por ba dang don ka Dong Ri War Circle bad kaba hap ha West Khasi Hills District kata naduh snem 2002-‘03”, ong u bah Stortonbin K. Kharai hynrei u la ong ruh um banse ban shim noh ïa ka rai ban weng noh ïa lade na ka FKJGP, namar ki nongïalam ki khlem suit ñiew ïa ki jingïakren ïa ki kam jong ki unit, lane kino kino ki mat jingdawa bad kane bunsien ka shu kut beit tang ha ka rai khlem trei kam.
