Ka pule puthi ka ïaid ryngkat ryngkat bad ki jingïalehkai: Grace Mary Kharpuri

Shillong, Ïaïong 07: “Ka pule puthi ka ïaid ryngkat ryngkat bad ka jingïalehkai, hynrei donkam ban trei shitom ban ïoh kheit ïa u soh jong ka jingjop,” ong ka Kong Grace Mary Kharpuri MDC ka Nongshken Constituency.
Ïa kane ka Kong Grace Mary Kharpuri kala ong haba kren kum ka Kongsan ha ka jingpynhap pyrda ïa ka Annual Sports Meet jong ka Ïewrynghep Secondary School, Mylliem ha kane ka sngi Palei ha madan ïalehkai football jong ka shnong Ïewrynghep.
Ka Kong Grace Mary Kharpuri kaba dei ruh ka Executive Member jong ka KHADC, kala ong ruh ba ka jingim khynnah skul kam dei eh tang ban pule kot hynrei donkam ruh ban pynpyngad ïa ka jabieng da ki jingïalehkai. ” Hooid ka jingpule ka dei kaba kongsan tam hynrei ha kajuh ka por ruh phi donkam ban lehkmen, kumta ka jingpynlong ïa kane ka annual sports meet kan long ban pynkmen ïaphi ki khynnah skul bad lyngba kane phi lah ban kiew sha ki kyrdan ba kham shalor.”
“Ka jingïalehkai sports ka long kaba donkam kumjuh ruh ka jingpule bad khlem ki jingïalehkai ruh phin ym kiew sha ki kyrdan ba kham shalor,” la ong ka Kong Grace.
“Ka jingïalehkai kala kiew bha ha satlak ka pyrthei, ha ka ri bad ha ka jylla jong ngi ruh kumjuh bad ngam artatien ba ha kawei ka sngi kin sa mih ki khlur ba tyngshaiñ na kane ka skul ruh kumjuh, bad kaba kongsan tam phi dei ban kynmaw ïa U Blei,” ong ka Kong Grace Mary Kharpuri.
U Bah RV Lyngdoh haba kren kum u Kongsan u la ong ba ki khynnah bad ki samla pule kidei ka lawei jong ka ri bad ka jaidbynriew. “Phi ki khynnah phi dei ka lawei jong ka ri bad ka jaidbynriew bad ka donkam ba phin trei shitom khnang ba phin long briew man briew lashai la shi sngi,” ong u Bah RV Lyngdoh.
U la ong ruh ba dei tang ka jingnang jingstad kaba lah ban weng lut ïa baroh ki jingeh bad ki jingsahdien la ka long ïa ka jingduk lane kino kino ki jingeh dei tang ka jingnang jingstad kaba lah ban weng ïa kita. U la kyntu ïa ki khynnah skul ba kin long kiba kohnguh sneng ïa ki nonghikai, kiba minot bad kyntu ruh ïa ki kmie ki kpa ba kin peit bad don bynta lem na bynta ki khun ha ka pule puthi ban pynthikna ba ki khun kin minot thop.
Ha kane ka sngi la donlang ruh ka Kong Marybamon Lyngwa kaba dei ka District School Education Officer kum ka special guest, u rangbah Shnong ka Ïewrynghep, ki nonghikai, ki nongshah khot sngewbha bad ki kmie ki kpa jong ki khynnah skul.
Ha kane ka annual Sports Meet ïa ka nam lahduh la ïoh rah da ka Blue House, ha ka march pass ha ka liang ki shynrang ïa ka nam ba nyngkong la jop da ka kynhun Mother Theresa (Green House) katba ha ka liang ki kynthei la jop da ka ka CV Rahman (Red House).
Kum ban pynkynmaw hangne ba ïa kane ka Annual Sports Meet la sdang naduh ka 25 tarik Lber bad la pynkut noh ha ka 7 tarik Ïaïong 2022 hapdeng ka jingiphuh iphieng.