Tang da ka khyndew bad ki maw la maramot ïa ka surok NH ha Narpuh, jur ka dheng kali ba maramot ia ka surok ha Narpuh

Khliehriat Naiwieng 17: Halor ka jingdawa ki paidbah bad ki kynhun sengbhalang, kiba la pynlong ruh da ka jingpakhang surok myn ha ka 14 tarik mynta u bnai, kumta ki nongtrei jong ka National Highway Authority of India ki la sdang ban maramot ïa ki bynta ba julor jong ka surok national highway-6 ha Narpuh, East Jaiñtia Hills District bad la lap bad sakhi ba la maramot ïa kane ka surok da kaba shu tap ïa ki thliew ki syar tang da ka khyndew bad ki maw.
Ha ka jingjurip, u mawphor u la lap ruh ba ka rukom pyntrei ïa ka jingmaramot ïa ka surok ha ki thaiñ Narpuh naduh Sonapur ter ter ka dang ïaid shaid shaid, tangba lah ban ong ba ka jingmaramot kan nym lah ban neh slem kumba ki paidbah ki khim lynti, namar tang shu ïaid ki kali, ka surok kan sa long biang kumjuh hi namar la maramot tang da ka khyndew bad ki maw.
Ha kaba ïakren bad ki nongñiah kali kiba na ka thaiñ, ki bym kwah ban pynpaw kyrteng, ki la pynpaw ka jingsngew khia halor ka rukom maramot ïa ka surok bad ong ruh ba kane ka dei tang ka jingpyntrei kaba tang dep rukom bad pynpaw ïa ka jingbym sngewhun satia ïa kane ka rukom maramot ia ka surok kaba long thulmur haduh katta katta.
Lah ban kynthoh ruh ba kane ka jingthep maw bad thep khyndew ha ki jaka ba long thliew khlem pep kan wanrah shuh shuh ïa ka jingpum pum ha ki por ba rang bad ka jingjyrsieh ha ki jaka ba lang um bad kan wanrah jingeh hi kumjuh tang hadien katto katne sngi.
La lap ruh ba kiba bun ki bynta jong ka surok bad ki bynta ha ki jingkieng ki buh jingma haduh katta katta ïa ki kali kiba leit ba wan, naduh ki kali heh kiba kit jingkit kumjuh ruh ki kali rit namar ka surok ka la i kum ka surok khlaw, ki jingker bad ki kynroh ha ki jingkieng ki la duh bad julor.
Na ka daw ka jingmaramot ïa ka surok bad kumjuh ruh ka jing sniew palat ka surok, ka la don ruh ka jingdheng kali kaba jur bha ha ka thaiñ Sonapur bad ha ki katto katne ki bynta jong ka surok ha Kuliang, Umkiang bad ka la wanrah ïa ka jingthut ha ka leit ka wan jong ki paidbah kiba ïaid lyngba, halor kane, na ka liang u mawphor un sa nang ïai bud dien.