Shillong, Naiwieng 16 : U Myntri ka tnad PWD (Building) u ma Dasakhiatbha Lamare mynta ka sngi Balang u la ong ba ym donkam ban aiti tohkit CBI halor ka jingkhyllem u Dome jongka ïing dorbar thawaiñ Assembly kaba thymmai ha Mawdiangdiang.
“ Ngam tharai ban donkam aiti tohkit sha ka CBI namar kat kum ka kaiphod jongka Indian Institute of Technology (IIT) Guwahati la lap ba kam don kano kano ka jingleh bakla haba pynbiang ïa ki tiar ki tar bad jingdro ban tei ia u Dome. Ka long kaei kaei kaba ym poi pyrkhat ba kan jia bad kaei kaba ngi dei ban leh mynta ka long ban syndong kti biang bad ïaid shakhmat ban pyndep ïa kane ka kam ba la sahteng noh tang na katei ka daw” ong u ma Dasakhiat.
U la kren ïa kane namar ki la mih bun ki jingdawa ba dei ban aiti tohkit noh sha ka CBI ïa katei ka jingtwa ne khyllem u Dome. U la pynshai ruh ba ka IIT Guwahati kam don kano kano ka jigïadei bad ki kontraktor ba tei ïa kane ka Assembly ka UPRNNL bad Badri Rai & Co.
“ Kat kum ba nga tip ka IIT Guwahati kam don kano kano ka jingïadei bad kitei ki kompani bad da lade nga la kren shai ïa ki ba ïa kaei kaei kaba phi leh leh da kaba janai namar lada phi bakla ngam lah ban pdiang khamtam lada nga tip ba phi ïadei bad kitei ki kompani ngan ym pdiang ïa ka kaiphod bad ka HPC ka lah ban weng noh ïaphi na ka jingtohkit ruh” ong biang u ma Dasakhiat.
Ha ka 30 tarik Nailur mytna u snem ka AITC lyngba u nongpathai khubor jongka u Saket Gokhale ka la kynnoh ba ha u 2018 ka IIT Guwahati ka la khot tender na ka bynta ban tei ïa 160 tylli ki ïing F-Type kiba dei ki quater. ka jingmang pisa ban tei ka la kot sha ka 136.86 klur tyngka. ïa kane ka kam la aiti ha ka UPRNNL kaba la ai kontrak pat sha kane ka Badri Rai & Co.
“ Lah ban ong ba ka IIT Guwahati kumba long mynta ka dang don hapdeng ka jingïateh kam kontrak bad ka UPRNNL kumjuh ruh bad ka Badri Rai & Co kiba dei kine ki juh ki kompani kiba pyntrei ïa une u dome ba khyllem ha Assembly thymmai ka jylla ha Mawdiangdiang. Na kata ka daw u Gokhale u la ong kumno phi mutdur ba ka IITG kan ai ïa ka kaiphod kaba khuid ba suba halor katei ka jingkhyllem u dome.
Shuh shuh u myntri u la ïathuh ba ka jingtei kan sdang biang tang shu la dep pynkhuid ïa kitei ki lyngkhot lyngkhai kiba la pra na ka jingkhyllem u dome. ïa ka jingohdur ba thymmai na ka bynta u dome ruh la dep mynjur dang shen. Ka jinglut jingsep baroh hap ban pynlut da kitei ki kompani hi. U la ïathuh ruh ba ka jingkhmih lynti ka long ban pyndep noh ïa kane ka Assembly ba thymmai hapoh hynriew bnai. “ Ngi kyrmen ba ngin lah ban pyndep ïa kane ka ïing dorbar ba thymmai shwa ka dorbar mang tyngka ha u snem 2023” ong u ma Dasakhiat.
