Kaei ka kyrdan jong ka Ktien Khasi mynta ha ka thoh ka pule : Dr. Sylvanus Lamare

Shillong, Naiwieng 16 : Uwei na ki Khrawpyrkhat ha ka Ktien Khasi ba dei ruh u Principal jong ka St. Edmund’s College, Dr. Sylvanus Lamare ha ka sngi Balang u la ong ba haduh mynta kim pat shai satia haei ka kyrdan jong ka Ktien Khasi ka don mynta watla ka jingdawa ban pynrung noh ïa ka ha ka Khyrnit kaba Phra ka la ïaid mynta la 44 snem.
“La pyrshang ban dawa mynta la 44 snem. Ka jingkylli pat na ka sorkar India mynta ka long – Kaei ka kyrdan jong ka Ktien Khasi mynta ha ka thoh ka pule? Kum ka ktien hikai mynta ka Ktien Khasi nga tharai ka don haduh klas 4. Haba ha u snem 1902 ka don haduh klas 6 balei mynta pat ha u snem 2022 pat ka don tang haduh klas 4. Kane kadei ka jingkylli ba ka sorkar India ka kylli,” u la ong haba kren h aka jingïalang kynmaw burom ïa ka lyngkhuh dap snem ba 112 ka jingkhlad noh u nongthoh ba khraw ka Jaidbynriew, u Pahep Rabon Sing Kharsuka.
Nalorkata u la ong ba ki mih ki jingkylli, “Kiei ki kot kaba phi lah ban pule, hato phi lah ban pule Jingkhein ha ka ktien Khasi, ngim don kot. Hato phi lah ban pule Science ha ka ktien Khasi ngim don kot.”
Shuh shuh u ong ruh ba hato la katei ka jingdawa ban ïoh ïa ka jingithuh ïa ka Ktien Khasi ka ïaid ryngkat neem pat bad ka jingdawa jong ka Jaidbynriew.
“Hato lada ka wan ka Education Policy 2020 kaba thymmai ngi lah neem ban pynbiang ïa ki jingdonkam baroh.”
Shuh shuh u ong ruh ba kane kadei ka juk ban pynmih kot ruh kam dei shuh kaba eh namar ïa ki kot lah ban pynmih ha ka dur e-book kaba mut ym donkam shuh ban thied ruh. U ong ruh ba lada ka sorkar lei lei ka kyrshang kane kan nang kyntiew shuh shuh ha ka jingpynmih ïa kum kitei ki kot.
Ha kawei pat ka liang, u Kongsan u la buh jingkylli ruh ïa ka jingong u Myntri Rangbah haba ïadei bad ka Literary Award na ka bynta ki nongthoh kiba la noh synniang ha ka ktien Khasi bad Garo. Katkum ka jingong jong u katei ka khusnam ka la don naduh mynshwa hynrei ka la jah noh mynta la bun snem.
Nalorkata, u ong ruh ba ha kane ka juk Social Media, ka don shibun ka lad na ka bynta ban pynneh pynsah ïa ka mynnor thik kumba leh ki nongshna phlim ha Thailand, Burma lane Malaysia ha kaba ki phlim jong ki bun ki dei beit shaphang ka kolshor.
Da kaba kynthoh khyndiat ïa ki phlim Khasi kiba bun tang ki khana jingieid mar ia sdang, sa ki jingïashoh ïa dat bad ki jingrwai, u Dr. Sylvanus u ong ruh ba kan iarap shibun lada phaikhmat lang ban shna wat ïa ki phlim kiba ïadei bad ki longshwa khnang ba kane ka pateng ban sa wan kan tip lang ïa ka mynnor.