Ha Mawphanlur yn ïakynduh ki nongmihkhmat ka NFNS bad ki kynhun dawa jylla ha North East

Shillong, Naiwieng, 16: Ka Hills State People Democratic Party (HSPDP) kaba la mih shakhmat ban ïakhun na ka bynta ban pynurlong ïa ka jingdawa la ka jong ka jylla Khasi-Jaiñtia ha ka sngi Baar ka la pynbna ba ka la long ka dkhot bapura jong ka National Federation of New State (NFNS) kaba long ka shatri jong ki kynhun na ki jylla bapher ka thaiñ Shatei Lammihngi bad na dewbah India ban dawa ïa la ka jong ka jylla ba thymmai.
“Ha ka 30 tarik mynta u bnai ngi la rai ban ïakynduh lang ha Mawphanlur, West Khasi Hills District tang bad ki kynhun ba dawa la ka jong ka jylla tang na ki jylla kiba don ha ka thaiñ Shatei Lammihngi. Ha kane ka jingïalang yn sa ïashim bynta lang da u Joint Secretary ka NFNS u Stalin na Karbi Anglong, u Co-Chairman u L. Marak bad kiwei kiwei de ki nongïalam jong ki kynhun bapher bapher na ki jylla ka thaiñ Shatei Lammihngi,” la ïathuh u President ka HSPDP u Bah KP Pangniang ha ka jingïakren bad ki lad pathai khubor.
Haba pyntip ïa ki kynhun kiba la mih ban dawa la ka jong ka jylla u Bah Pangniang u la ong, “ha Meghalaya, ka la don ka jingdawa jylla Garoland da ka Garoland State Movement Committee (GSMC) bad ka jingdawa Jylla Khasi-Jaiñtia da ka HSPDP. Ha ka thaiñ Shatei Lammihngi kiwei kiwei ki kynhun kiba dawa la ka jong ka jylla ki long ka Bodoland, Tripraland, ka Gorkhaland, Karbi-Anglong, Dima Hasao bad kiwei kiwei. Lyngba ka kynhun NFNS ngin ieng tylli kawei ban dawa lang, ban kyrshan lang bad ban pynsngew sha ki nongsynshar jong ngi ha ka Parliament.”
U la ïathuh ba ka NFNS ka don jingthmu ban ïathir ïatai sani bha ba baroh ki jylla kiba dawa ïa la ka jong ka jylla kin sa ïashim bynta lang ban leit pynsngew ïa ka jingdawa jylla ba thymmai ha New Delhi ha ki sngi ba la sdang ka Dorbar Tlang jong ka Parliament.
Ha kaba ïadei bad ka jingshimti jong ka HSPDP ban pynïoh ïa ka jylla Khasi Jaiñtia, u Bah Pangniang u la ong, “ngi la rai mynta ka sngi ban bynshet ha ka Election Committee jong ka party ba kan pynbeit thymmai biang ïa ka Election Manifesto jong ka party ha kaba ïadei bad ka jingpynrung ïa ka jingdawa Jylla Khasi-Jaiñtia kaba la don naduh mynshwa.
“Ngin sa pynbha shuh shuh ïa ka Election Manifesto jong ka HSPDP bad ïa kane ka kam la bynshet ha u President, u General Secretary, Chairman bad Secretary jong ka State Election Committee ka party ban khmih bniah na ka bynta ban pynbha ïa ka Election Manifesto ïa kaba yn sa pyllait paidbah shwa ban leit sha ka Elekshon jong ka Iingdorbar Thawaiñ ka Jylla,” la ïathuh u Bah Pangniang.
U la ïathuh ruh ba ka HSPDP ka la shim ïa rai ban pynrung ha ka Election Manifesto ban dawa ba dei ban pynkhlaiñ shuh shuh ïa ka Khyrnit Bahynriew da kaba pynbeit thymmai ïa ka Para 12 A (b) khnang ba ka bor ka iktiar halor ki mawpohkhyndew bad ka kam synshar ka khadar kin long na ka Sorkar Jylla ym na ka Sorkar Pdeng.
“Ngi rai ban pyrshah ïa ka jingtih Uranium bad ka jingthmu ban wanrah ïa ka Lynti Rel katba ym pat don ki aiñ ki kanun bapyrkhing,” u la ong bad bynrap, “ngi dawa ïa ka Sorkar ba dei ban pyndep ïa ka jingpynbeit ïa u pud u sam hapdeng ka Meghalaya bad Assam.”
“Kumba ka Iingdorba Thawaiñ ka ladep mynjur ïa ka Resolution, ngi dawa ïa ka Sorkar Jylla ba kan buddien na ka Sorkar India ha kaba ïadei bad ka jingpyntreikam ïa ka Inner Line Permit ha kane ka jylla,” la ïathuh u Bah Pangniang bad bynrap, ba ka Sorkar Jylla ka dei ban buddien ha kaba ïadei bad ka jingdawa ban pynrung ïa ka Ktien Khasi ha ka Khyrnit Baphra jong ka Riti Synshar ka ri India.
“Ngi dawa ba dei ban khmih biang ïa ka Reservation Policy kaba la ktah shikatdei eh ïa ki paid Khasi Pnar jong ngi. Ïa kane ngi la buh ha ka Election Manifesto ba dei ban peit biang, phaidien bad ban khmih bniah sa shisien. Ngi ieng skhem kum ka party ba ka Youth Policy lada ngi wan ha ka por ngin pyntreikam ïa kane ka polisi khnang ba ka jylla jong ngi kin don ki Skill Development na ka bynta ki samla,” u la ong.
U la ong ruh ba ka jylla Meghalaya kam pat don ïa ka polisi na ka bynta ban ïarap bad ban kyntiew ïa ki nongrep bad ïa ka jingstad kaba ki don ha ka rep ka rïang.