Rah ka Manipur ïa ka nam lahduh, paw ka Meghalaya kum ka jylla ba kiew kynsan ha ka North East Olympic Games

Shillong, Naiwieng 16 : La bun ki takma kiba la ïoh ban khur bad la bun ruh ki paralok ba ïoh ban ïa kynduh ha kine ki hynñiew sngi jong ka 2nd North East Olympic Games 2022 kaba la kut noh ha kane ka sngi Balang ha ka jingpynhap pyrda kaba la pynlong ha ka rukom kaba shongkun bha.
Ha kane ka lympung, ka Manipur ka la ïoh ïa ka nam kum ka lahduh lane ka Overall Champions bad ïoh ban pynneh ïa ka nam lahduh ba ka ïoh ban bat ha ka NEOG 2018. Ka Manipur ka la ïoh ban khur haduh 88 tylli ki takma ksiar, 75 tylli ki takma rupa bad 77 tylli ki takma rnong katba ka Assam pat kaba wan ha ka kyrdan kaba ar ka la ïoh da ki 79 tylli ki takma ksiar, 61 tylli ki takma rupa bad 63 tylli ki takma rnong.
Ka jingïoh ka Manipur ban knieh ïa ka kyrdan kaba nyngkong kadei hadien ka jingïakhun kaba itynnad bha kaba long ha kane ka sngi kut pyrshah ïa ka Assam. Hynrei haba phai pat sha ka Arunachal Pradesh, katei ka kynhun ka la neh ha ka kyrdan kaba lai da ki 39 tylli ki takma ksiar, 36 tylli ki takma rupa bad 37 tylli ki takma rnong.
Haba phai pat sha ka Meghalaya kaba dei ka trai jaka, ka la pyni shisha sha ka pyrthei ba ka la kiew stet ha katei ka lympung namar na ka kyrdan kaba hynriew kaba ka don ha u snem 2018 mynta pat ka la kiew sha ka kyrdan kaba saw mynta u snem da ki 36 tylli ki takma ksiar kaba long haduh 12 shah na kaba ki ïoh ha u snem 2018.
Ha kane ka kynti kaba mynta ka Meghalaya ka la ïoh ruh ban khur haduh 35 tylli ki takma rupa bad 78 tylli ki takma rnong. Ïa katei ka lympung la wan ban pynhap pyrda da u Chief Patron jong ka Games, uba dei ruh u Myntri Rangbah ka jylla u Conrad K Sangma, nangta u Myntri ka tnad kam ïalehkai ka jylla, Bah Banteidor Lyngdoh, Myntri ka tnad PHE jong ka sorkar jylla, Bah Renikton Lyngdoh Tongkhar, Chairman ka Meghalaya State Planning Board u Abdus Saleh, Bah Kimfa S Marbaniang MLA, nangta u Chief Secretary ka jylla Bah DP Wahlang, Commissioner & Secretary ka tnad ïalehkai Dr. Vijay Kumar D, Director General ka Meghalaya Police Dr Lajja Ram Bishnoi bad Secretary General ka North East Olympic Association, Bah John F Kharshiing.
Na ka liang u Myntri Rangbah u la aiti ruh ïa ka khusnam Overall Champions sha ka Manipur nangta ïa ka khusnam ba ar sha ka Assam bad ruh ïa ka khusnam kaba lai sha ka Arunachal Pradesh. Ïa ka lama jong ka North East Olympic Games la aiti pat sha u Bah John Kharshiing uba hadien pat u la aiti sha u Chef de Mission ka Nagaland, u Neilyalie Angami, namar kadei ka jylla kaban sa pynlong ïa katei ka lympung ha ka samoi ban wan.
Ïa katei ka lympung la pynhap pyrda ha ryngkat ki jinglehkmen, ka kynhoi ka risa bad khamtam eh ka rwai ka siaw ba la ai da ki nongrwai ba paw kynthup naduh ka Ahlyna, Gracel Ropmay, Banjop, Lamphang Syiemlieh nalor ka jingpynthaba ba har rukom kaba la pynkhih met lut ïa baroh ki nongïalehkai ha shwa ba kin leit phai noh sha la ki jong ki jong ki shnong ki thaw bad sha la ki jong ki jylla.