Shillong, Ïaiong 06 : U Lamphang ka Iing Dorbar Thawaiñ ka Jylla, Bah Metbah Lyngdoh ha ka sngi Balang u la lum ka jingïalang bad ki heh sorkar na ki tnad bapher bapher kiba don bynta ha ka jingpyntrei ïa ka Iing Dorbar ba thymmai ha Mawdiangdiang.
Ha katei ka jingïalang, u Lamphang u la ïatai sani ruh ïa baroh ki kam kiba dei naduh bad ka tnad Public Works Department, Meghalaya Power Distribution Corporation Limited, National Informatics Centre, Forests & Environment, nalor kiwei kiwei.
Hadien ka jingïalang, u Lamphang u la pynpaw ïa ka jingsngewhun haba ïadei bad ka jingïaid stet ka kam tangba u kdew pat ba dang donkam ban peit ba ïa katei ka projek dei ban pyndep ha ka por ba la buh. Shuh shuh u ong ruh ba ki sngewkmen ba ka kor rah tiar (crane) kaba pyndonkam na ka bynta ban kyntiew ïa ka jingtei ba la pynwandur ban buh ha jrong jong katei ka Iing Dorbar ka la dep kumba 75 persen ka kam.
U ong ruh ba ka jingpyntrei na ka bynta ka minar, kaba dei ka bynta ba hakhlieh duh jong ka jingtei, kan sdang noh naduh ka taiew ban wan. “Ngi kwah ban pyndep noh la kumno kumno ïa ka kam ha u Naitung bad ka jingsdang pyndonkam bad pyrshang yn pyndep hapoh shibnai la kumno ha shwa ban kut u Nailar,” u la bynrap shuh shuh.
U Lamphang u la pynpaw ruh ba kadei ka jingthrang jong ka sorkar ban plie noh ïa katei ka jingtei ha u Nailur mynta u snem.
Haba ïadei pat bad pisa kaba wan na ka sorkar pdeng, u la ïathuh ba u la dep ban ïakren bad u Mynri Rangbahduh ka Ri, u Narendra Modi bad ruh bad ka tnad Platyngka jong ka sorkar pdeng.
“Nga lah ban ong ba ngin sa ïoh ïa ka jingkyrshan pisa na ka sorkar pdeng,” u la bynrap shuh shuh.
