Shillong, Iaiong 6 : Ka All Khasi Hills Achik Federation (AKHAF) ka pynpaw ka jingpyrshah jur halor ka soskular ne ka Memorandum of Understanding (MoU) ba la ïasoi hapdeng ka Meghalaya bad Assam haka 29 tarik Lber 2022 ha nongbah Delhi namar ki don haduh 15 tylli ki shnong kiba ju hap ha Meghalaya la pynhap noh sha Assam. Kine ki dei kum ka Hahim, Salbari, Marchapra bad kiwei kiwei.
Ka AKHAF ka sngew pyrshah jur ïa kane namar ka la ïohi ba kito ki shnong ba sah ki paid Garo ki la ïa kynduh ïa ki jingeh mar ïa shah pynhap sha Assam. Kumta ka seng ka pynpaw ba kam hun ïa kane ka jingïa ai bad ïashim jaka markylliang.
U Myntri Rangbah ka jylla ula dei ban leit jngoh ïa kine ki jaka ban ïohi da lade bad bishar bniah biang ïa ka MoU. “ Ngi kwah ban tip balei tang ka Meghalaya kaba hap ban ai balei ka Assam pat kam ai tang u Myntri Rangbah jong ngi uba ai katba u Myntri Rangbah ka Assam u shu pdiang” ong ka AKHAF.
Kumta halor kane ka seng ka dawa ba u myntri rangbah u dei ban bishar bniah biang ïa ka soskular bad lada um leh ka seng kan ïaid da kawei pat ka lynti. Ka seng ka la pynpaw ruh ba ïa ki Regional Committee ym dei ban shu thung tang na ka liang ka sorkar hynrei la dei ban thung na ka Liang Pyrshah bad Seng Bhalang ruh. Khnang ba kan ym don ka jingnoh shilliang bad ba ka rai ruh kan long kaba pynhun lut ïa baroh. Ka seng ka pynrem jur ïa ki committee ba la thung da ka sorkar MDA bad ka sorkar MDA ka dei ban shim ka jingkitkhlieh lada jia ei ei nangne shakhmat, pynkut ka kyrwoh na ka AKHAF.
