Pynkynmaw ka SRSBA ïa ka Sorkar MDA ban pynïoh biang ïa ka Block-II sha Meghalaya

Shillong, ïaïong, 06: Ki nongïalam jong ka Synjuk ki Rangbah Shnong Border Area (SRSBA), Raid Nongtung kaba hap hapoh ka Hima Khyrim ha ka sngi Balang ki la leit pynsngew hakhmat u Symbud Myntri Rangbah jong ka Sorkar Jylla u Bah Prestone Tynsong ba ka Sorkar Meghalaya ka dei ban tuklar noh mardor na ka bynta ban pynïoh biang ïa ki 18 tylli ki shnong kiba hap hapoh ka thaiñ Block-II shapoh u pud u sam jong ka Jylla Meghalaya ha ka jingïapynbeit pud ha ka kylla kaba ar lane ka Phase-II.
Ka Block-II ka kynthup ïa ki 18 tylli ki shnong kiba don kumba phra hajar ngut ki nongshong shnong kiba dei ki Khasi. Kine ki 18 tylli ki shnong ki long ka Jatalong, Sabuda, Madan Umwang, Khlieh Umwang, Umlaper, Umtlieh, Umsarang, Umru, Umjaktat, Laru, Pdengtliej, Itpatung, Ummat Umsder, Umsawlum Dorbar, Umtyrshing bad ka shnong Umsohlaper.
“Ka jingïakynduh ïa u Symbud Myntri Rangbah ka long tang ban wan pynkynmaw ïa ka Sorkar ba ka dei ban pynïoh biang ïa ki 18 tylli ki shnong kiba hap hapoh ka Block-II sha ka Jylla Meghalaya,” ong u Chairman jong ka Synjuk u Bah Blikstar Sohtun ha ka jingïakren bad ki lad pathai khubor hadien ka jingïakynduh bad u Symbud Myntri Rangbah.
“U Symbud Myntri Rangbah u la kular ba un sa shimkhia ia kane ka jingpynsngew jong ngi da kaba iasyllok lang bad ki paidbah ynda ka Sorkar Assam bad ka Sorkar Meghalaya ki la iapynbeit ia u pud u sam ha ka kylla kaba ar (Phase-II,” ong u Bah Sohtun.
Ha ka dorkhas ba ka Synjuk ka la aiti ha u Symbud Myntri Rangbah ka la pynkynmaw ba ha u snem 1951, u Lat barim jong ka Jylla Assam u la pynngat jubor ïa ka Block-I bad Block-II kaba hap hapoh ka Jowai Sub Division (Civil) sha ka Mikir Hills kaba kynthup ïa kiba bun tylli ki shnong Khasi Pnar. Ïa mynta bun na kine ki shnong kiba hap hapoh ka BlockiII ki dei kiba la buhai shong da ki Karbi bad kiwei kiwei.
“Naduh hyndai hynthai kine ki shnong Khasi kiba hap hapoh ka Raid Nongung kim dei satia ki bynta jong ka Block-II hynrei dei na ka daw ka jingkyntur pud jong ka Assam, kine ki shnong jong ngi ki la shu shah pynngat jubor ha ka Block-II,” la ong u Bah Sohtun.
Haba pyntip pyntip ba ka Sorkar Assam ka ju long mawjynthud ïa ki kam pynroi haba ka Sorkar Meghalaya ka pyntreikam ïa ki skhim jong ka Sorkar Jylla bad jong ka Sorkar Pdeng u la ong, “Ka Sorkar Assam ka phah pynpra ïa ka Building Eri Silk ha Madan Umwang ba la bei pisa da ka tnat Sericulture ka Sorkar Meghalaya. Ïa ka ing shet-ja sngi (mid day meal scheme) ba la shna da ka tnat Pule Puthi ka Sorkar Jylla, ruh ka Sorkar Assam ka phah pynpra. Ka Sorkar Assam ka la pynsangeh wat ïa ka jingpynpoi bording elektrik ha ka shnong Sabud da ka tnat Bording jong ka Meghalaya ha u bnai Jymmang, 2017.”
“Ha u bnai Jymmang, 2018 ki Pulit Assam ki la pynwit ban shna ïa ka ingskul jong ka Madan Umwang Lower Primary SSA School ba la bei pisa da ka SSA. Ha u bnai Nailar, 2018, ki Pulit Assamki la pynsangeh ban shna ïa ka ing skul jong ka Khlieh Umwang Lower Primary SSA School bad khot hajir ruh ïa u Rangabh Shnong jong ka Khlieh Umwang sha Ulukunji Out Post kaba hap hapoh ka Baithalangso Police Station, Assam,” la ïathuh shuh shuh une u Chairman jong ka Synjuk.
“Ha u bnai Nailar, 2022, ka Sorkar Assam ka la buh ïa ka ktem Pulit ba shipor ha ka shnong Umlaper hynrei kaba dang treikam haduh mynta wat hapdeng ka jingpyrshah kaba jur jong ki Khasi bad ka Synjuk ki Rangbah Shnong Border Area,” u la ong.
U la kynthoh ruh ba ka Sorkar Assam ka la leh arsap shaba palat da kaba wanrah ïa ki kam pynroi ha kine ki shnong katba mon khlem da burom shuh wat ïa ka Status Quo ba la ïasoi hapdeng ka Meghalaya bad ka Assam.
“Ha u bnai Ïaiong, 2018, ka Sorkar Assam ka la thmu ban buh ïa ka ktem Pulit ha ka shnong Umru bad sdang ban tei ïa ka Out Post bad dei da ka jingpyrshah jong ka Sorkar Meghalaya la pynsangeh ban shna ïa kane ka ktem sah ki Pulit hynrei haduh mynta ki Pulit ka Assam ki dang sah ha kane ka shnong haduh mynta,” la ïathuh u Bah Sohtun.
“Ha u Naitung, 2018, ka Sorkar Assam ka la pynieng ïa ka Signboard, kaba thoh ‘Welcome to Karbi Anglong District’ ha ka shnong Sabuda ïa kaba la pynjulor noh da ka Khasi Students Union. Ka Sorkar Assam ka la tei ïa ka Greater Chingthong Sports Complex ha Umlaper naduh u Rymphang, 2019 bad shna ruh ïa ka surok naduh Umlaper sha Pomprah,” la pynpaw ka Synjuk ha ka dorkhas.
Halor kine ki jingpynibor bad ka jingkyntur pud jong ka Assam, ka Synjuk ka la dawa ïa ka Sorkar Meghalaya ban buh noh ïa ka Police Out Post ha ki shnong Khasi, ban buh ïa ka Police Outpost ha ka shnong Madan Umwang.
Ka Synjuk ka la pyntip ruh ba ka Election Department jong ka Sorkar Assam ka la buh palat 10 tylli ki Polling Station ha ki shnong Khasi watla kine ki shnong ki la shah pynhap ha ka jingïakajia pud. “Ki shnong Khasi kiba hap hapoh ka Mawhati Constituency ki la shah pynngat hapoh ka Baithalangso Assembly Constituency ka Jylla Assam. Ha ka elekshon Lok Sabha 2014 ki paidbah ki hap ban leit thep vote shaduh ka shnong Khyndewso lane Mawlasnai namarba ka Election Department jong ka Sorkar Meghalaya kam shym la buh wat tang kawei ruh ka Polling Station ha kine ki shnong Khasi,” ong ka Synjuk.
“Ngi dawa, namarkata, ïa ka Sorkar Meghalaya ban buh ïa ka Polling Station ha ophis jong ka Ummat Area Employment Council, ha ha Sabuda Presbyterian LP SSA School, ha Umtlieh SSA LP School, ha Umshangktad SSA LP School,” la dawa ka Synjuk.