Shillong, Ïaiong 06: Ka Jylla Meghalaya kala sah satang 18 ngut ki briew kiba dang pang Covid-19 ne ki active case.
Haduh san tylli ki District kila lait na kane ka jingpang bad kine ki dei ka Ri-Bhoi District, South West Khasi Hills, East Garo Hills, South Garo Hills bad ka South West Garo Hills.
Kat kum ka jingpyntip ka Tnad ka Koit ka Khiah, ki briew ba dang ïabit thymmai ïa ka jingpang kila don satang san ngut mynta ka sngi katba arngut ki nongpang ila ïoh pat ïa ka jingkoit. Ka jingdon jong kiba ïap ka long 1593 ngut baroh lang.
Haduh 93779 ngut ki briew kila ïabit ïa kane ka jingpang ha kine ki laisnem tam mynta hynrei haduh 92168 kila ïoh pat ïa ka jingkoit.
