Jowai, Ïaïong 06: Katkum ka khubor ba la phah da u ma Daniel Khongsit Rangbah Shnong Bakur ula pyntip ba ka Dorbar Shnong Bakur kan long haka 8 tarik mynta u bnai ïaïong ha Community jong ka shnong naduh ka por 10 baje mynstep, kane ka Dorbar ka long shi bynta ban pynsngew ïa report treikam bad ban pynthymmai ïa ki nongkitkam Shnong.
La ïathuh ha kaba ïadei bad ka jingjied Waheh Shnong kan long da kaba ïathep vote (secret ballot) bad ki nongshong shnong kim dei ban duna ïaka mar shiteng naka jingbun paid jong ka Shnong. Halor kane ka Shnong ka khot bad kyrpad ïa baroh ki nongshong Shnong Shynrang bad kynthei bad kumjuh ïaki para Shnong ba sah sha bar shnong ban ïa poi khlem pep ha katei ka sngi, khnang ba ki kam ka shnong ki long kiba ïaid beit ïaid ryntih, la ong u ma Khongsit.
