Wan pynkup burom u CM ka Assam ia ki Pulit ba pyndep ia ki jinghikai pyntbit

Nongpoh, Ïaïong 06: Haduh 578 ngut ki Sub Inspector of Police na ka jylla Assam mynta ka sngi ki la shah pynkup burom ha u myntri rangbah ka jylla Assam, u Himanta Biswas Sharma, kaba dei hadien ba ki la pyndep ïa ka jingshah ai jinghikai ba la tip kum ka ‘50th Batch of Basic Course’ kaba dei ka jingshah ai jinghikai baki hap ban pyntbit haba ki la shim ïa ka lyngkor ban long kum kita ki Sub Inspector of Police ha ka jylla Assam.
Kum ban pynkynmaw, kane ka jingpynkup burom ne ka jingleh burom ïa kine ki Sub Inspector of Police ka Assam ha North East Police Academy (NEPA) ha ka shnong Umsaw kaba don ha Ri Bhoi, ka dei ruh kawei na ka jingpynkup burom kaba la heh tam ha ka history jong ka North East Police Academy naduh ba la la sdang ban seng ïa kane ka shlem ai jinghikai ïa ki Pulit ophisar ka thain Shatei lam mihngi ha u snem 1978, ki pulit ophisar kiba la shah ai jinghikai bad pyndep ha katei ka sngi ki la kot sha ka 578 ngut bad kynthup 178 ngut ki dei ki pulit ophisar kynthei.
Kane ka jingpynkup burom ne kata ka Dikshant Parade (Passing Out Parade) la pynlong ha Parade Ground ka NEPA ha Umsaw ba hap ha Ri Bhoi District bad u myntri rangbah ka jylla Assam, u Himanta Biswas Sharma u la wan hi ban shim bynta kum u kongsan ban lehburom ïa kine ki Sub Inspector kiba dei na ka jylla Assam.
La sakhi lang ruh ha kane ka sngi da ka jingdon lang DG ka Assam, u Bhaskar Jyoti Mahanta, u Director ka NEPA, u Deepak Kumar, u Deputy Commissioner ka Ri Bhoi, u Arpit Upadhyaya, u SP ka Ri Bhoi, u Giri Prasad bad kiwei kiweik ki heh pulit ophisar bad kynthup ruh naduh ki bahaiing hasem kitei ki Sub Inspector bad kitei ki Sub Inspector kiba la pyndep pura ïa ka jingshah ai jinghikai katkum ba la buh da ka sorkar.
Shuwa ba kine ki 678 ngut ki sub inspector of Police ka Assam kin shimti ïa ka kam ban leit shakri sha ki paidbah, u Director ka NEPA, u Depak Kumar u la shim ruh ïa ka bynta ban pynsmai ïa ki katkum ki kyndon treikam ka tnad pulit ba ki hap ban don ka jingkitkhlieh kum kita ki pulit ophisar haba kin leit pat ban shakri sha ki paidbah kum ki pulit.
Shuwa ban sam ïa ki khusnam sha ki Sub Inspector kiba la wan bha sha khmat ha kane ka jingshah ai jinghikai ha katei ka shlem ai jinghikai ïa ki pulit ophisar, la pynlong ruh ïa ka parade ba la shim bynta da u myntri Rangbah ka Assam, u Himanta Biswas Sharma bad kitei ki Sub Inspector of Police ha ka March Pass ki la ai ïa ka salute ban burom kum uta u myntri rangbah ka jylla halor kane ka kyndan kaba ki la ioh ban bat bad ban pyndep kumba la buh da ka sorkar.
Haba kren ha kane ka sngi, na ka liang u myntri Rangbah ka jylla, u Himanta Biswas Sharma u la pynpaw ka jingkmen ban ioh ban shim bynta ban leh burom ïa kine ki Sub Inspector of Police kiba dei hi ki pulit ophisar na ka jylla Assam bad u la ong ruh haduh 578 ngut ki la pyndep ban shimti ïa ka kamram ban trei kum ki pulit ka long ka burom ïa ka jylla Assam hi baroh kawei.
U la ai khublei kypang ruh ïa u Director ka NEPA, u Depak Kumar bad kiwei ki pulit ophishar ka NEPA halor ka jingtrei shitom jongki ban pyndep hok ïa kane ka jingai jinghikai ïa kitei ki pulit ophisar bad wat hapdeng ka jingwan lynshop ka khlam COVID-19 bad ki dang lah thik thik ban pyndep ïa kita ki jingai jinghikai tad haduh kane ka sngi kaba khraw kaba long ka jingsah jingkynmaw ïa kitei ki pulit ophisar kiba la pyndep ïa jingshah ai jinghikai na ka bynta ban shakri sha ki paidbah ka jylla Assam.
U la kren shai ruh ba ka sorkar Assam kan dang pynkhlain ïa ki bor pulit hapoh ka jylla, namar ka thong hi ka long ban pynduh jaid ïa baroh ki kam sniew bad kino kino ki kynhun kiba thmu ban pynthud ïa ka shongsuk shongsain ki paidbah bad na ka liang ka sorkar Assam kan ïakhun pyrshah ruh halor ka jingkynrei u drok uba la ktah bha wat ha baroh ki jylla shatei lam mihngi ka ri India.
Da kaba ai mynsiem ruh ïa kitei ki Sub Inspector kiba la ioh ïa ka burom mynta ka sngi, u Myntri rangbah ka jylla Assam, u HImanta Biswas Sharma u la kyntu ruh ïa ki da kaba ong, “kumba ki la shimti ïa kane ka kam ban long kita ki Pulit Ophisar, ki dei ban trei na ka bynta ka jingbha jong ki paidbah ka jylla bad ka kamram jongki kum ki Pulit kam shym dei tang ban ïa khun ïa ki kam sniew kiba ktah ïa ka imlang ka sahlang, hynrei ki dei ruh ban don ka jingkitkhlieh ban tei ïa la ka jylla bad ka ri ba kan dang kiew shaphrang ha baroh ki liang” u la bynrap.