Shillong, Ïaiong 06 : U Myntri Rangbah ka Assam ba dei ruh u nongïalam ba hakhmat eh ka BJP na Assam, u Himanta Biswa Sarma ha ka sngi Balang u la ong ba ka party ka buh thong ban jop kham bun ki MLA ha Meghalaya ha ka elekshon MLA kaban long ha u snem 2023.
Haba kren bad ki lad pathai khubor hadien ka jingïalang ha Umsaw, Ri Bhoi, u Himanta u la ong ba ka BJP ka la pynkhreh bha na bynta katei ka elekshon ha Meghalaya namar ka la don lypa ïa ka nongrim ha man ki jaka.
“Bad ngin pyrshang ban jop khambun shuh shuh na kaei kaba ngi jop ha u 2018,” u la bynrap shuh shuh.
Lah ban kdew hangne, ba ka BJP ka don arngut ki MLA ha Meghalaya kiba treilang ha ka sorkar jylla ha ka sorkar Meghalaya Democratic Alliance hapoh ka jingïalam jong ka National People’s Party.
Ki arngut ki MLA ka BJP ha Meghalaya ki kynthup ïa u MLA ka Shillong South, Bah Sanbor Shullai ba dei ruh u Myntri ka tnad Arts and Culture bad ruh u Bah AL Hek, MLA ka Pynthorumkhrah.
