Halor ka Preliminary Notification jong Revenue & Disaster Management Department, Shillong ba mih ha ka 9 tarik, Rymphang, 2022

Mawkyrwat, Ïaïong, 06: Ka Kur Syiemlieh Sawkpoh kaba hap hapoh jong ka Hima Maharam, South West Khasi Hills ha ka 5 tarik u Ïaïong, 2022 hadien ka jingpynmih khubor ha ka 09 tarik u Rymphang, 2022 kaba dei na ka Revenue & Disaster Management Department, Shillong jong ka Sorkar jylla, ka Preliminary Notification (tinder section 11(1) of the act-30/2013) ki la leit ban ïa kynduh ïa ka Deputy Commissioner, South West Khasi Hills District, kong Caramai Kharkongngor, IAS ban ujor pyrshah ïa kane.
Kane ka jingleit ban ïa kynduh bad leit ujor jong ka Kur Syiemlieh Sawkpoh hapoh jong ka ophis jong ka Deputy Commissioner, ka long hadien ba ka la don ka jingthoh kaba shai ba lada don kino kino kiba ujor pyrshah ïa kane ka jingshim jaka u/ka nongujor ki lah banphah sha ka Deputy Commissioner, South West Khasi Hills District hapoh 60 sngi naduh ba la pynmih ïa kane ka jingpyntip kaba hapoh ka kyndon 15 jong katei ka aiñ.
U bah Bankyrshan Syiemlieh, dkhot EC jong ka Kur Syiemlieh Saw Kpoh jong ka Hima Hamaram haba kren ha ki lad pathai khubor hadien ka jingleit ban ïa kynduh ïa ka Deputy Commissioner, South West Khasi Hills District, u la ong ba ka jingleit ban ïa kynduh jong ki ïa ka, ka long hadien ka jingshah ïuhroit ki jaka jong kur ha u Syiem ka Hima Maharam Syiemship mynta lah da ki phew snem.
U la pynpaw ruh ba kaba kongsan ka jingleit ïa kynduh jong ki ïa ka DC ka long halor ka jingmih khubor ha ka 9 tarik u Rymphang, 2022 ba la pynmih lyngba ka Revenue & Disaster Management Department, Shillong ba ïa ki jaka ha Kakergora, Rajapara, Jamaduar, Rangasora,Karaigora Munaisora, bad katkum ba la kdew ha ka Preliminary Notification ba u Syiem u la kam ba ka dei ka jaka jong ka Hima, hynrei dang ha u snem 2003 katkum ka jingpynban, la thoh shai ïa ki pud sawdong ba thikna ba katei ka jaka ka dei jong ka Kur Syiemlieh Sawkpoh Maharam.
Namarkata, halor kane ka jingshah ïuhroit jong ka Kur, kum ki samla kim lah ban shu sngap hynrei ki la mih paidbah ban pynsngew bad ïathuh ïa ki jingshisha baroh ba ka jingpynbna da ka Preliminary Notification jong ka Revenue & Disaster Management Department, Shillong jong ka Sorkar jylla, ka long kaba bakla. “Nangne shakhmat kum ki samla jong ka Kur Syiemlieh Sawkpoh Maharam kim lah ban shu sngap ïa ka jingshah ïuhroit, ba ïa ki jaka jong ka kur yn kam trai da kiwei pat ki bym dei napoh ka kpoh”, ong u bah Bankyrshan.
Na ka liang jong u bah Anderson Syiemlieh, Manager Kur Syiemlieh Saw Kpoh Hima Maharam u la pynpaw ba kum ka Kur ka wan mynta hangne ban ïa kynduh ïa ka Deputy Commissioner ban buh ka jingujor ba kan pynsangeh noh shwa ïa katei ka jingpynbna kaba la mih ha ki lad pathai khubor.
Ha kaba ïadei bad ki jaka puta, u bah Anderson u la ong ba kum ka Kur lyngba ki kñi kin nym pynkulmar kai ïa ngi, ba ngi ngi dei ki trai ïa ki jaka ha ki thaiñ Ranikor lyngba ka jingsakhi da ki kot ki sla, hynrei kumba ka paw mynta ruh kum ka hima ka la kam trai ba dei ma ki ki trai jaka. Namarkata, ka jingkyrpad ka long ba kin ïa pyni lem ïa kita ki kot halor ka jinglong trai ïa ki jaka khnang ba kan long ka jingïashai baroh ar liang manla. “Hynrei u la pynskhem ba kiba bun ki kot ki sla ki wan na ka liang jong ka aiñ ne Court”, u la ong bad haba ïa leh bad ka aiñ lada dei ki bym kot bor kin nym lah ban leh ei ei bad ngi duh ïa ka jinglong trai.
U la ïathuh ba katkum ka jingthoh ba la pynmih ha ka 9 tarik u Rymphang, 2022 la paw ba kita ki kyrteng baki kam ba ki dei ki nongrep, hynrei pynban ki dei ki briew kiba don burom don akor bad kane ka dei tang ka jingmyntoi jong ka shi ïing shi sem jongno re jongno.
Kumta u la buh ka jingkyrpad ba la da kane ka pateng kaba mynta kam lah ban leh ei ei, ka pateng jong ka Kur Syiemlieh Saw Kpoh Hima Maharam ka ban sawan kan sa leh ïa kaba donkam bad kyrmen ruh ba ki bor ba halor lyngba ka District Administration kin sa wad bniah bad shim ïa ka rai ba bha tam kumba ka Kur hi ka shaniah ba kin long ki nongïalam kiba beit kiba hok na ka bynta ka bha ka miat jong ki paidbah.
Ha kane ka sngi la synranglang ruh naduh ki kñi, ki longkpa longkmie bad ki samla shynrang bad kynthei jong ka Kur Syiemlieh Sawkpoh kaba hap hapoh jong ka Hima Maharam, South West Khasi Hills.