Ïoh khusnam ‘District Green Champion Award’ ka Sngap Syiem College, Mawkyrwat

Mawkyrwat, Ïaïong, 06: Ka Ministry jong ka Education Government of India lyngba ka Mahatma Gandhi National Council of Rural Education (MGNCRE) ka la jied bad pynkup burom ïa ka Sngap Syiem College, Mawkyrwat ha ka thup jong ka District Green Champion Award 2021-2022.
Ïa kane ka National Level Award la pynshong nongrim halor ki report treikam jong ka College lyngba ki komiti bapher bapher kynthup ïa ka National Service Scheme (NSS) Unit kaba la trei bor bah ha ki snem ba lah dep. Kum ban shu pynkynmaw ka National Service Scheme jong ka College ha ki snem ba la dep ka la ïoh ban pynlong 3 tylli ki shnong ryngkat ki kam (activities) kiba bun ba la noh synñiang ha ka imlang sahlang.
Kane ka khusnam ka ai mynsiem shikatdei eh ïa ki jaka pule khamtam ha ki jaka nongkyndong ban nangtrei kham bha ym tang hapoh ki saw kynroh jong ka kolej hynrei ban kner ruh ïa ki jingtrei kam sha ka imlang sahlang.
Ïa kane ka khusnam la phah da ka Ministry of Education jong ka Sorkar India lyngba ka ophis jong ka Deputy Commissioner, South West Khasi Hills District. La leit ban pdiang ïa kane ka khusnam ha ka 4 tarik Ïaïong, 2022 da u Dr. K.K. Nongsiej, I/c Principal jong ka Sngap Syiem College, Mawkyrwat lem bad ki nonghikai bad la aiti da ka Madam C. Kharkongngor, IAS, Deputy Commissioner, South West Khasi Hills District ha ka jingdon ryngkat u bah S.C Laloo, MCS, ADM, South West Khasi Hills District.