Shillong, Naiwieng, 11: Ban pyntip sha ka pyrthei ba ka jaidbynriew Hynniewtrep Hynniew-skum ka long kaba riewspah ha ka kolshor, ka Seng Khasi Kmie kan sa pynlong ïa ka tamasa kaba ar sngi ha ka 19 bad ka 20 tarik, Naiwieng, 2022 ïa kaba la ai kyrteng “na thymmei’ ban sa pynlong
U Cultural Secretary jong ka Seng Khasi Kmie Mawkhar, Shillong u Bah Hamar Sing Kharpa ha ka jingïakren bad ki lad pathai khubor ha ka Sngi Thohdieng u la ïathuh ba ha kane ka tamasa ban sa pynlong ha lympung shad suk mynsiem kaba don ha Jaïaw, Shillong, kin sa don ki jingshad bad ki jingrwai sur tynrai bad kumjuh ruh ka jingïakop pyni riam tynrai ba la ai kyrteng Nai Khatsaw synnia bad ka Lukhimai bad kynthup ruh ka jingrwai Kynud Ïawbei na ka shnong Kongthong.
Kawei na ki bynta kiba kongsan tam ha kane ka tamasa kan dei ka jingpyni ïa kawei ka phlim lyngkot kaba la ai kyrteng, “ka Thymmei, ka Tynre, ka Tyllong’.
Shuh shuh u la ïathuh ba kin sa don 14 tylli ki kynhun ki ban sa ïashim bynta ha kane ka tamasa kaba ar sngi kiba kynthup ïa ka kynhun na ka shnong Nongtalang, Jowai, Sohbar, Mylliem bad kiwei kiwei.
Ka Seng Khasi Kmie ka khot bad wer ïa ki nongshong shnong ka bri u hynniewtrep ban wan sakhi ïa kane ka tamasa bym donkam siew bai rung.
