Ym tang ki kali shipai, ki kali Sorkar ne kali shimet kiba khaïi drok beaiñ kin ngat beit : HM

Shillong, Ïaiong 05 : U Bah Lahkmen Rymbui, Myntri ka tnad pohïing, u la ong ba ka sorkar kan nym talasei tang ïa ki kali shipai, hynrei kan talasi bad kali sorkar bad kali shimet ruh bad lada lap ba ki kit drok, ka sorkar kan aiñ kan treikam beit na ka bynta jong ki.
Halor ka jingbthah jong ka Meghalaya High Court ban talasi kynsan kynsan wat ïa ki kali shipai ruh halor ka jingkynnoh ba teng teng ïa u drok la ju pynkit da ki kali shipai, na ka liang u Myntri Kampohiing ka Jylla, u la ong ba ïa mynta um pat lah satia ban kren ei ei halor katei ka bynta.
Da kaba pynpaw ba na ka liang jong ka sorkar ka dang bishar bniah halor katei ka phang na ka bynta ban ïakhun ïa ka jingkhaii drok, u Myntri haba kren bad ki lad pathai khubor u la ong, “Na bynta ka jingbha jong ka jylla, ngim kwah satia ba kum kine ki kam beaiñ kin ïoh rung sha ka jylla bad kadei ruh ka kamram jong ka sorkar ban pyrkhing ïa ka jingkhaii drok.”
U Myntri u ong ruh ba hadien katei ka jingbthah na ka High Court kadei ka kamram jong ka sorkar ban pyntikna ban pyrkhing ïa ka jingïakhun.
Haba jubab halor ka jingkylli, u Myntri u ong ruh ba kino kino ki kali kampher la ki dei ki kali shimet ne kali sorkar hynrei haba ki kit ïa ki mar beaiñ kin ym lait satia na kti jong ka aiñ.