Hiar leit jngoh u MLA ïa kiba khlad bad longïing ba julor na ka jingtwa khyndew
Yn shim khia ban pynioh jingiarap na ka sorkar
Shillong, Ïaiong 05 : U Bah Banteidor Lyngdoh, MLA ka Mawkynrew Constituency uba dei ruh u Myntri Sorkar Jylla, ha ka 05 tarik u Ïaiong, 2022 u la hiar sha ki shnong ha ka Constituency kiba la mad ïa ka jingsohsat na ka jingwan lynshop ki bor mariang na ka daw ka jingjur slap palat ha katei ka thaiñ.
Ha kane ka jingleit jngoh ïa ki lanot, u MLA u la noh synñiang da ka jingïarap pisa sha ki longïing kiba la shah pynjulor na ka jingtwa khyndew ha ka 4 tarik u Ïaiong, 2022 ha kaba arngut ki mynsiem briew kila duh ei ïa ka jingim.
Kum ban shu kdew ba na ka jingjia twa khyndew ha Mawlat, ar ngut ki briew kiba la tip kyrteng kum u Rohit Kshiar (14 snem) na Mawlat bad ka Kong Dilibon Tangsang ( 35 snem) na Mawkria, ki la duh ei ïa la ka jingim hadien ba ka jingtwa khyndew ka la rong lang ïa ki katba ki dang ïaid lynti.
Ha kaba ïadei bad kane, u MLA u la kular ban shim khia ban pynthikna ba ki bahaïing jong kine ki ar ngut ki dei ban ïoh ïa ka jingïarap pisa na ka Sorkar Jylla kaba long mar saw lak tyngka.
Ka jingjia twa khyndew ha Umblai ka la pynjulor ïa ar tylli ki ïing bad ar tylli ki dukan katba ha Thangbnai-Mawlyngot ka surok ka la julor na ka jingtwa khyndew bad kawei ka kali ka la shah rong. Ka tnad PWD ka Sorkar Jylla ka la phah ïa ki briew ban pynkhuid ïa ka jingtwa khyndew kaba dang ïaid sha khmat mynta.
Katba ha ka shnong Lynshing, 4 tylli ki longïing ki la shah pynjulor na kane ka jingjia twa khyndew bad u wei u la mynsaw.
U Bah Banteidor u la pynpaw ba u la ïakren bad ka tnad PWD ban peit bniah ba kan nym don jingtwa khyndew ha ki surok bad khat noh ïa ka khyndew kiba lah ban twa ha ki bynta rud surok.
Ha kane ka jingleit jngoh ïa ki longïing bad kumjuh ka jingleit sngewlem sha ki longïing jong kiba la khlad noh la ïa don lang da u BDO ka Mawkynrew, Bah LT Tariang, ki ophisar ka tnad PWD, ki nongïalam shnong bad ki riewrangbah na kitei ki shnong.
U Bah Banteidor u la ïathuh ba ka surok na ka skhim PMGSY ha Lynshing ka la dep bad yn dang pyntrei biang sha ki bynta ba kham sharum bad yn leh bha ïa ki kynroh bad kiwei pat ki jingdonkam ban lait na ki jingjia twa khyndew.