Shillong, Ïaiong 05 : Ka jingthmu jong ka sorkar jylla ban pyntreikam noh da ki bos skul na ka bynta ban ïa khun ïa ka dheng kali khamtam ha nongbah Shillong ïa mynta hi ym pat lah satia ban ong la kaei kan ïarap ne kan pynjur shuh shuh pynban ïa ka dheng kali kaba la syrtok lypa.
Haba kren halor kane kaphang, u Myntri ka tnad Pule Puthi ka sorkar jylla, Bah Lahkmen Rymbui u la ong, “U Myntri Rangbah u la dep ïohi ïa ka jingeh ki khynnah skul khamtam ïa ka jingeh ha ka leit ka wan u la shim ïa ka rai ban don noh da ki bos skul ban leit buh leit shaw ïa ki khynnah skul. Tangba, shwa ban leh ïa ka ngi hap ban peit bha namar ki don bun ki jingeh kiba mih.
U Myntri u la kdew ruh ba kawei na ki jingeh ba kin kynduh ka long haei yn pynieng ïa kitei ki 100 tylli lane 50 tylli ki bos skul namar bun ki jaka ha sor ki la khapngiah lypa. “Ynda la dep leit buh ïa ki khynnah ha ki skul bapher bapher haei pat kin leit pynieng,” u la ong.
Shuh shuh u ong ruh ba kawei pat ka jingeh ka long hangno yn buh ïa ka jaka ban kyntiew ne pynhiar ïa ki khynnah namar bun ki jaka la dep ban pyndonkam lut da ki briew kiba kamai ïa ki jakpoh man ka sngi.
Ka jingeh kaba lai, katkum ka jingong jong u, kadei ba kitei ki bos kin ym lah ban rung ha ki surok shnong, kumta ki kmie ki kpa ki hap ban wan buh ïa ki khun ki kti ha ki jaka ba la buh ban shaw ne wan buh. “Kumta kine ki surok shnong kin kylla long ki jaka buh kali ban ap ïa ki khynnah skul. Kane ruh kan wanrah ïa ka jingeh ïa ki nongleit nongwan,” u la bynrap biang.
Da kaba kdew ïa kitei ki jingeh ba ki lah ban kynduh, u Myntri u la ong ba kin hap mynta pat ban ïa shong pyrkhat bad syllok lang khnang ba ka jingthmu ban pynkylluid ïa ki surok kali kan long kaba seisoh ym ba kan nang pynjur shuh shuh ïa ka jingkhapngiah.
“Shwa ba ngin pyntreikam ngin ïa syllok lang shwa la ka long naduh ki skul, ki kmie ki kpa, ki bor pynïaid kali, naduh naduh ki bor distrik khnang ba ynda la pyntreikam kane ka projek kan long kaba jop na bynta ka jingbit jingbiang jong ki khynnah skul bad jong ki nongshong shnong baroh.”
Kumban shu kdew hangne, ka nongbah Shillong naduh sngi Nyngkong haduh sngi Thohdieng ka mad beit ïa ka dheng kali tang shu poi ka por leit skul bad por wai skul. Ka daw ka long ba na bynta iwei i khynnah la pyndonkam kawei ka kali kumta na ka bynta ki hajar ngut ki khynnah la hap ban ieng laiñ ha kajuh ka surok da ki hajar tylli ki kali.
