Shillong, Iaiong 05: Ha ka Sngi U Blei ki shipai BSF hadien ba ki la ïoh ïa ka jingtip kaba thikna ki la pynlong ïa ka jingap ktem ryngkat ki pulit jong ka jylla Meghalaya bad ha kane ka jingap ktem ki la ïoh ban kem ïa ki ar ngut ki kynthei na khappud bad ka Bangladesh.
Ha kane ka jingïoh kem ïa kine ki kynthei la ïoh ban kurup 1790 tylli ki kuli dih pynbuaid kiba kyrteng Yabba tablets kaba hap hapoh jong ka South West Khasi Hills District. ïa kine la ïoh ban kem na Karaigora da ki kynhun 193 Bn ki BSF.
Na ka liang jong ki BSF ki la ong ba kine ki kynthei ar ngut la tip kyrteng kum ka Jasmine Sangma 45 snem bad ka Ritima Sangma 40 snem baroh ar ngut ki dei ki nongshong shnong jong ka shnong Bholabita na East Khasi Hills district. ïa kine kiba la ïoh kem la aiti sha ki pulit ban leh ïa kaba don kam katkum ka aiñ.
