Shillong, Iaiong 5 : U Myntri ka tnad PHE u bah Renikton Lyngdoh Tongkhar u la ong ba un leit jurip kyrkieh ha kino kino ki jaka lada u ïoh pdiang ïa ki jingujor ba ki kontraktor ki pyndonkam da ki pipe ba la rim ban ring umdih. U la ong ïa kane ha ki nongthoh khubor namar ki lah ban don ki jaka ba ki kontraktor ki leh kumta ruh.
“ Nga kwah ban leit jurip hi da lade lada nga ïoh jingujor ba la pyndonkam da ki pipe ba rim ban pyntreikam ïa ka skhim JJM namar kat kum kane ka skhim ki pipe ki dei ban long beit kiba thymmai kumba la mang pisa da ka sorkar pdeng ruh. Lada don kino kino ki jaka ba ki paidbah ki lap ba la pyndonkam da ki pipe ba rim ki dei ban ai ka jingujor khnang ban ïoh leh ïa kaba donkam” ong u bah Renikton.
“ Ngan long uba kmen eh lada nga ïoh pdiang ïa ki jingujor namar ngan ïoh ban leit jurip da lade ban lap ïa ki jingshisha bad lada lap kumta kita ki kontraktor kiba pyndonkam da ki pipe ba rim kin duh kam syndon”: ong biang u Myntri.
U la ïathuh kumba long mynta kumba 40 % na ka kam la dep ring umdih sha ki long ïing ki briew ha ki thaiñ nongkyndong bad ka thong ka long ban pyndep nadong shadong hapoh ka 31 tarik u Nohprah 2022.
Ka Meghalaya ka dei kawei na ki jylla kaba la pyntreikam hok bha ïa kane ka skhim bad dei na kata ka daw ka la ïoh khusnam sa 400 klur tyngka na ka sorkar pdeng bad lyngba kane kan dang ai mynsiem shuh shuh ban pyndep ka jingring umdih sha ki long ïing jong ki briew hapoh u Nohprah. Kumba long kat hadu mynta hi na ka jingïaid sted ka kam la kyrmen ba yn lah beit ban pyndep ïa kane ka skhim kumba la buh hapoh ka 31 tarik Nohprah 2022, ong u bah Renikton.
U la ïathuh na katei ka 400 klur kaba la ïoh pdiang da ka jylla na ka sorkar pdeng yn sa lah ruh ban pynkhuid ïa ki bill jong ki kontraktor. “ Kumba 40 % na ka kam la dep bad namar ba ngi ïoh ia kane ka song jingïarap ba 400 tyngka na ka sorkar pdeng ngin ïoh ban siew ïa ki bill bad thied ruh ïa ki pipe” ong biang u Myntri PHE.
“ Nga kwah ruh ban ïathuh ïa phi ba ka tnad PHE ka treikam bha bad nga ai khublei ïa baroh ki ophisar bad ki engineer jong ka tnad kiba la trei shitom ban pyndep kat kum ka jingbuh thong bad dei ruh lyngba jong ki ba ngi la ïoh pdiang ïa kane ka song pisa na ka sorkar pdeng” ong u bah Thongkhar.
Ki don tang hynriew tylli ki jylla ha ka ri baroh kawei kiba la ïoh khusnam song pisa na ka sorkar pdeng kynthup ïa ka Meghalaya. Kita kilong Arunachal Pradesh, Manipur, Sikkim bad Himachal Pradesh. Ka Arunachal Pradesh ka ïoh 542 klur, ka Manipur 120 klur, Meghalaya 400 klur, Sikkim 70 klur, Tripura 100 klur bad Himachal Pradesh 750 klur.
