Shillong, Iaiong 05 : Ka Meghalaya Tourism Development Corporation Ltd (MTDC) ka la tyrwa ban kyntiew ïa ki kam jngohkai kiba ïaiaid lang ryngkat ryngkat bad ka mariang ne kata ka Adventure Tourism,ïathuh u Chairman ka Corporation u Saleng A Sangma.
“ Na ka liang ka Corporation ngi la tyrwa bun kiei kiei sha ka sorkar ban kyntiew ïa ki kam jngohkai bad khring ïa ki nongwan jngohkai shapoh ka jylla. Ngi la tyrwa kum ka Paragliding, parasailing, rappelling bad ter ter. Kaba ngi kham phai khmat ka long bad ka Adventure Tourism namar ngi don ka mariang kaba itynnad”.
“ Ka jingitynnad ïa kiei kiei ki jingthaw bad jingpynlong jongka mariang ka long kawei kaba khring bha ïa ki nongwan jngohkai. Naduh ba ka sorkar ka la sangeh ia ka ban test COVID ki la nang bun biang ki nongwan jngohkai kiba wan sha ka jylla Meghalaya namar ngi ïoh jingtip ba ki hotel ki la sdang dap briew biang kum mynshwa” ong u Saleng.
Ka jylla Meghalaya ka dei kawei na ki jylla kaba ki khun samla jongka kim duna ka jingbun ïa ka 70 % bad kane ka jingpyrshang ban kyntiew ïa ka adventure tourism kan khring ïa ki khun samla ban ïashim bynta ha kane ka kam karkhana ka ban pynïoh kam ïoh jam ïa ki hi ong biang u Saleng.
Ka tnad kam jngohkai jongka sorkar jylla ka don ka jingpyrshang ban kyntiew ïa kane ka kam jngohkai lyngba ka Swadesh Darshan Scheme jongka sorkar.
“ Ngi ïohi ba ki samla ha ka jylla ki kham ïaphai khmat sha ki kam ïaleh kai sport kat kum kane ka juk ba mynta bad kiba bun ki kam sport kiba lah ban kyntiew ïa kane ka kam kum ka jingkiew lum, jingïaid kjat, ka jingdon ki pung kiba itynnad, ki wah kiba sngur bad kiwei kiwei ruh” la ong u Chairman.
Kiba kham paw ki Adventure Tourism ki long kum ka Zip Lining, Rappelling, Water Falls Rappelling, Canyoning, scuba diving, paddling, caving bad ter ter bad ka por kaba biang tam ban ialehkai ïa kine ka long shwa ban poi ka lyiur bad ha ka por tlang.
