Jowai, Ïaïong 04: Ka jingbteng u slap ba jur haduh hynnin ka sngi 4 tarik kala pynlong ïa ka wah Umngot ban shlei lut bad kane kala ktah ruh ki ïing briew kiba don hapoh ka shnong Shnongpdeng West Jaiñtia Hills na ka daw ka jingwan poi ka um ba heh shaduh ki tyngkong ïing.
Na ka liang ka Shnongpdeng Tourism Development Society (STDS) kala ïathuh ba kane ka jingther u slap ba jur kala ktah eh ïa ka jaka shangkai ka ‘Shnongpdeng Tourist Spot’ bad ka long ruh ka jingduh nong kaba khraw eh ïa katei ka jaka namar wat ki ïing trep kiba don hajan ka wah kila shah rong lut haka um.
La ïathuh ruh kaba ka jingbteng u slap naduh ka por mynstep jong ka 4 tarik ka um heh kala rong kumjuh ïa bun tylli ki lieng, ïa ki ïing jaiñ (Tent), ki tiar ki tar ba pyndonkam ha ki campsites bad kala long ka jingduh nong kaba khraw ïa ki briew jong ka shnong khamtam kito kiba im ja na ka kam jngohkai pyrthei hapoh ka shnong.
Shuh shuh kane ka jingheh jong ka wah kala pynjulor ruh ïa ki jaka leit bar (Public Toilet) bad ïa shibun tylli ki ïing sahmiet kiba don ha ki bynta ba sharum jong ka shnong.
Kane ka jingshlei um kala pynkthang ïa ki paid ka shnong bad ka long ruh ka jingduh nong kaba khraw eh khamtam ha ka liang jong ka kam jngohkai pyrthei ïa kito ki spah ngut kiba im na kane ka kam hapoh jong ka shnong Shnongpdeng.
