Nongstoiñ, Ïaïong 05: Ka jingpynkiew dor jong ka sorkar ïa ka petrol, diesel bad ki mar ki mata ka la ktah jur ïa ki paidbah nongshong shnong hapoh ka jylla baroh kawei, ong ki nongïalam ka Nongstoiñ Block Congress Committee, kiba la pynlong ïa ka jingïalang ha Congress Bhavan New Nongstoiñ.
Ha kane ka jingïalang ban pynpaw ïa ka jingpyrshah, la ïadon lang da ki nongïalam jong ka Congress ba kynthup ïa u Virendra Singh secretary ka All Indïa Congress Committee u ba dei peit ïa ka jylla Meghalaya, u bah Manuel Badwar secretary ka Meghalaya Pradesh Youth Congress Committee bad u bah Goldenstar Nonglong, nangta ki dkhot jong ka West Khasi Hills District Congress Committee kiba la wan na ki lai tylli ki Constituency kata na Mawshynrut, Rambrai bad Nongstoiñ.
Ki nongïalam ka Congress haba ïakren bad ki nongthoh khubor, ki la ong ba hadien ba ki paitbah ka jylla ki la ud la nam halor ka jingkiew dor kynsan jong ka umphniang kali bad ki mar ki mata, ki la leit ban pynlong ïa ki jingïalang ha man la ki District hapoh ka jylla na ka bynta ban ïakren bad ïatai sani halor katei ka jingeh, bad kunmo ban pynsngew sha ka sorkar pdeng lyngba u Ma Vincent H Pala ba un pynsngew ha ka dorbar parliament ha kane ka dorbar lyiur kaba sa long shen.
Nalor kata ki la ong ruh ba ka sorkar NDA kaba la ïalam da ka Bharatya Janata Party, ka dei ka sorkar ka bym pyrkhat satia ïa ki ba duk ba suk bad ki paitbah ha ki nongkyndong, da kaba pynkiew dor palat pud kat haduh ba ki paitbah kim lah shuh ban siew ban tda na ka bynta ki jingdon kam ha ïing ha sem.
Ha kajuh ka por ki la ong ba ka sorkar NDA ka la kynnoh ruh ba ka jingkiew dor ki mar ki mata bad ka umphniang kali, ka dei na ka daw jong ka thma hapdeng ka Russia bad ka Ukraine. Hynrei katkum ka jingtip jong ki, kam shym dei na kata ka daw namar ba ka sorkar India ka la thied bun bah ka crude oil na ka ri Russia ha ka Rouble, kaba dei ka dor jong ka pisa Russia ym shuh ha ka Dollar bad katei ka jingkynnoh ka dei tang ban pynbiej ïa ki paitbah.
Kitei ki nongïalam ka Congress ryngkat ka jingïadonlang jong ki dkhot jong ka West Khasi Hills District Youth Congress Committee kiba la wan na Mawshynrut Block Congress, Rambrai Jyrngam Block Congress bad Nongstoiñ Block Congress ki la pynpaw ruh ïa ka jingpyrshah bad pynrem ïa ka sorkar NDA, da kaba rah ïa ki placard kiba la thoh ïa ki kyntien pynrem kiba bun bad kiba kit jingmut da kaba pyrta ruh ba ki pynrem jur ïa ka sorkar NDA halor ka jingleh bym suidñiew ïa ki paitbah.
Ki la ong ba katei ka jingïalang ka dei tang ka jingsdang bad lada ka sorkar NDA kam sngap ïa ka jingdawa jong ki, kin sa lum ïa ki paitbah ka jylla baroh kawei ban pynlong da ka jingïakhih kaba tyngeh.
