Jowai, Ïaïong 05: Ka lympung ïalehkai phutbol ba la tip kum ka ‘2nd U Adelbert Laloo Memorial Trophy’ jong ka kyrdan 3rd Division Football Tournament 2022 ba la pynïaid da ka West Jaiñtia District Sports Association (WJDSA) kaba la long mynta ka sngi 5 tarik u Ïaïong ha madan Kiang Nangbha Stadium Jowai.
Ha ka jingïakhun ba nyngkong mynta ka sngi ka kynhun ïalehkai jong ka Madan Thadmuthlong kala jop da 2-0 kol pyrshah ïa ka Mulang Ialong bad ïa katei ka ar kol la theh marwei da u rang ïalehkai ka Madan Tnadmuthlong u Precious Tang ha ka minit kaba 4 bad ka minit ba 39.
Ha ka jingïakhun ba ar ba la wan ban aireng hapdeng ka ka Maitshaphrang Mootyrshiah pyrshah ïa ka Ksehsylle Ialong bad ka jingïakhun kala long kaba ïakhait bah namar kitei ki ar kynhun kiba ïakhun dohïap ban theh ïa ki kol hynrei haduh ba kut jong ka jingïakhun kala kut noh da kaba ïakhait da mar shikol 1-1 kol. Ïa ka kol na ka Maitshaphrang la theh da u Sanborlang Tang ha ka minit ba 12 bad na ka liang ka Ksehsylle la ïoh ban pynphai ïa ka shi kol da u Teimiki Lyngdoh ha ka minit ba 73.
Katba ha ka jingïakhun kaba lai pat kaba la long hapdeng ka Lumkhang-dong Kyndongtuber pyrshah ïa ka Lumchyrmang Mihmyntdu kane ruh ki kynhun ïalehkai kila ïakhait da 0-0 kol khlem da don kiba ïoh thep kol haduh ba kut ka jingïakhun.
Ka jingïakhun lashai ka sngi 6 tarik kan long hapdeng ka Myrjai pyrshah ïa ka Moodymmai ha ka por 11 baje mynstep, ka Khliehshnong Ialong pyrshah ïa ka Royal Pole Mihmyntdu ha ka por 1 baje nohphai sngi bad ka Tympang pyrshah ïa ka Mukhla Umlangshor haka por 3 baje janmiet.
