Nongpoh, Naiwieng 02: Ka National President ka BJP Mahila haba wan iuh kjat hynnin ka sngi Baar ha Nongpoh ha ka ophis treikam ka BJP ha Gladden Tower, Nongpoh ka la kular ban wan rah shibun ki kam pynori na ka bynta ki paidbah ka Ri Bhoi bad ha ka jylla hi baroh kawei.
Kane ka National President ka BJP Mahilia, ka Vanathi Srinivasan shuwa ba kan leit ban iuh kjat ha Nongbah Shillong ka la hiar ban ïa kynduh ïa ki nongïalam ka BJP ha Nongpoh bad ha kane ka jingwan iuh kjat jongka, ka la ioh lad ban ïa kynduh ïa ki nongïalam bad ki nong kyrshan ka BJP kaba long ruh shi bynta ban pyn khlaiñ ïa ka BJP party ha kane ka election jied nong mihkhat jong u snem 2023 ban sa wan hapoh ka jylla.
Ïa kane ka nongïalam ba hakhlieh duh na ka liang ki kynthei na ka party BJP, la pdiang burom ïa ka da ka State Secretary ka BJP Meghalaya, ka Kong Marian Maring bad ryngkat ka jingdon lang kiwei kiwei ki nongïalam bad ki nongkyrshan ka BJP na Nongpoh bad na Ri Bhoi District.
Haba kren ha kane ka jingïakynduh bad ki nongïalam ka BJP na Nongpoh, katei ka National President ka BJP Mahila, ka Vanathi Srinivasan ka la pynpaw ka jingkmen ban ioh lad ban ïa kynduh ïa ki nongïalam bad ki nongkyrshan ka BJP kaba long shi bynta ban pynkhlaiñ ïa ka party BJP na ka bynta ka samoi jied nongmihkhmat jong u snem 2023 hapoh ka jylla Meghalaya.
Kumba ka nongrim ka BJP, ka ieng bad ka shakri na ka bynta ki baduk bad ki paidbah ban wan rah shibun ki jingkylla ha ka jingsynshar ka BJP, ka Vanathi Srinivasan ka la ong ba don shibun kiba la pyrshang ban ïalam bakla ïa ki paidbah hapoh ka jylla Meghalaya bad ka daw ka long ba ki sheptieng ba ioh ka BJP kan ioh ban synshar kumba ki paidbah ha kylleng ka ri India ki ai bor ïa ka BJP kaba trei na ka bynta ka jingkylla hapoh ka ri hi baroh kawei.
Kum ka nongïalam na ka liang ki Longkmie, ka Vanathi Srinivasan ka la kular ruh ban wan rah shibun ki kam pynroi na ka sorkar kmie hapoh kane ka District bad ha ka jylla Meghalaya bad ban wan ki kam pynroi ka la kyrpad ruh ïa ki paidbah ban pynkup bor ïa ka BJP ha kane ka election 2023 ha Meghalaya.
Shuh shuh, ka la kular ruh ban phai khmat kyrpang na ka bynta ki nongrep ka Ri Bhoi bad ha ka jylla Meghalaya bad kawei na ka thong jong ka sorkar BJP ka long ruh ba kyntiew ïa ki nongrep bad lyngba ki song jingïarap ïa ki Nongrep ka khmih lynti ba ki nongrep ha Meghalaya kin dang kiew ha ka ioh ka kot. Kaba khamtam ka la pynshai ruh ba ki paidbah ki dei ban sngewthuh ba tang 10 percent ki kam pynroi ki dei kiba mang na ka sorkar jylla bad haduh 90 percent ki dei ki kam pynroi kiba ai da ka sorkar kmie ha ka jingsynshar ka party BJP, ka la bynrap.
