Jowai, Naiwieng 02 : Ka North East Adventist University (NEAU) kaba don ha shnong Khliehtyrshi West Jaiñtia Hills District ha kane ka 31 tarik u Risaw kala kynmaw burom ïa ka ‘National Unity Day’ lane ka Rashtriya Ekta Diwas, kane ka prokram kala long shisha kaba i shongkun namar ka jingdon ki jingshad, jingrwai, ki jingpyni nam kiba long da ki tynrai la jong.
Kane ka prokram ka long shi bynta na ka jingrakhe dap 147 snem u Sardar Vallabhai Patel bad ka phang jong ki ka ong “Unity in Cultural Diversity” lyngba ka jingïatreilang ka Department of Sociology hapoh ka jingïalam Dr. Jemima Maji Marak bad ka Organizing Committee kaba peit ithuh ïa ki jait ktien bapher bapher.
La ïathuh hapoh kane ka jaka pule University ki don shibun ki nongwan pule na ki jait bynriew ki bapher bapher ha ka ktien ka thylliej, ka ñiam ka rukom bad ki riti ki dustur kiba bun jait, hynrei ki long pat kum shipara naduh ka jingïatylli, ka jingïaieit bad ka jingïasngewthuh jingmut lang kawei ban wanrah ïaka bha ka miat. Ha kane ka prokram ba shisngi la don ruh ki jingpyni nam ïa ki ïing bala shna ha ki por ba rim, ki jingshad tynrai, ki jingïalehkai Sports bad ka jingwanrah ïa ki jingbam tynrai ba bun jait.
Na ka liang u ma Wailadmiki Shylla, MLA ka 2nd Jowai Constituency ula long kum u kongsan ha ryngkat ka jingdonlang u sumbud kongsan ma L. Dkhar, MDC, JHADC, u ma K. Rymbai Waheh Shnong ka Khliehtyrshi, Dr. Eliah Srikakoli, Chancellor ka University nalor ki kmie ki kpa bad ki khynnah skul.
Ïa u kongsan la pdiang sngewbha ha ryngkat ka jingtied ïa ka bom ha kaba naka liang jong u ruh ula pynpaw ka jingsngewkmen ban ïohi ïa kum kine ki jingpynkhreh kiba long shisha ki lad ban pynneh pynsah ïa ki riti ki dustur.
Ha kane ka sngi ka ïoh ruh ban pule ïa ka History jong ka National Unity Day da ka kong Phiralynn Kharkongor kawei na ki nonghikai Assistant Professors ka University.
Kiwei de ki prokram ba la leh ha kane ka sngi ki long ka Shad Pliang ki Jaiñtia, ka shad mastieh ki Khasi, shad Wangala ki Garos, ka Jhumur jong ki Aadivasis, ka Cheraw ki Mizos, Mamita ki Reangs, ka Ememei Dado ki Maos, ka Sawlakia ki Maras bad ka Lagre jong ki Santhals.
Katba ha ka liang ki jait jingïalehkai ba la pynlong ki kynthup ïa ka Rong Biria U Khasi, Wa’pong Sika ki Garos, Insaihrui Pawh ki Mizos bad ka Waa Kabi jong ki Manipuris. La pynkut ïa ka prokram da ka’ Traditional music fest’ ba la shim bynta shongshit ha ka jingrwai tynrai.
