Nongstoiñ, Naiwieng, 2: Ka Hynñiewtrep Youths Council Ri-Muliang Circle ha ka ka sngi balang, ka la leit buh jingthoh ha ophis treikam jong u Deputy Commissioner West Khasi Hills, ban pan jingshai ïa ka jingkren bad jingkular jong u Symbud Myntri Rangbah ka jylla u Bah Prestone Tynsong, ban ai C&RD Block ar tylli ha Rambrai Constituency kata ha Rambrai bad ha Ri-Muliang.
Lah ban pynkynmaw ba katei ka jingkular ka la paw pyrthei ha ka 30 tarik Naitung 2022, hynrei haduh mynta ym pat paw dak ei ei. Kumta na ka liang ka seng ka dawa na ka sorkar ba ka dei ban pynpaw noh ïa ka kam ym ban shu kular kai tang ka syntur.
“Ka seng ka la ong ruh ba ka jingwanrah ïa ka C&RD Block kam dei pat ban long ka jingïohnong Politic ïano ïano. Kumjuh ruh ba ym dei ban shu kular kai ïa kaei ba phi la dep kren tang ban ïoh nong Politic, namar kumba long mynta ba ka ilekshon ruh ka la jan, lada kane ka jingkular ka dei tang na ka bynta ki elekshon, na ka liang ka seng ka pynpaw ba da lei lei kam lah pdiang”, ong u samla Distarbor Wanniang President HYC Ri Muliang.
U la ong ruh, “Lada ka jia ba shu kular kai, ka seng ka hap ban dawa na u Bah Prestone Tynsong symbud myntri rangbah, ba u dei ban ai noh na u ïa kata ka Block. Na ka liang ka seng haba ïakren bad u DC, u la ong ba haduh mynta kam pat don kano kano ka jingai jingtip ne jingpynbna da ka sorkar ha kaba ïadei bad kane ka bynta. Kumta ngin ap katto katne por bad lada shu kular thok, ngi ruh ngin hap leh ïa kaba donkam”.
