Bad ki khun ki kti yn ïakhih paidbah ki nonghikai skul Ahodc hadien ki eksam

Shillong, Ïaïong,04: Ki nonghikai skul Adhoc ki la byrngem ban pynlong ïa ka jingïakhih paidbah kaba heh ha nongbah Shillong hadien ka eksamin SSLC bad HSSLC lada ka Sorkar Meghalaya Democratic Alliance (MDA) ka dang ïai leh mynthi ïa ki jingdawa.
“Ngi la lum lut ïa ki nonghikai skul Adhoc na baroh ki District jong ka jylla. Lada ka Sorkar ka sngap kyllut ïaka jingïakhih, hadien ka eksamin SSLC bad HSSLC, ka FASToM kan pynlong da ka jingïakhih paidbah ha kaba yn ïashim bynta palat shiphew hajar ngut ki nonghikai,” ong u Nongaiktien jong ka FASToM u Bah Mayborn Lyngdoh ha u kyrwoh ba la phah sha ki lad pathai khubor ha ka Lah Sngi u Blei.
“Kane ka kynthup ïa ki 8000 hajar ngut ki nonghikai skul Adhoc, ki kurim jong ki, ki khun ki kti, ki khynnah skul, ki khynnah skul barim, bad ki paidbah ruh ki lah ban ïasnohkti lang,” ong u kyrwoh.
Ka jingïakhih jong ka FASToM haduh mynta ka la kynjoh sha ka taiew kaba lai haduh mynta ka Lah Sngi U Blei. “Ka CEC ka la shim ïa ka rai ban pynlong da ka jingdeng lama ïong baroh shitaiew haba leit sha skul ka ban long kum shibynta na ka jingïakhih ha ka jylla baroh,” la bynrap u kyrwoh.