Shillong, Ïaiong 04: Ka Jylla Meghalaya kala sakhi ba haduh 5 tylli ki District kila lait na kane ka khlam da ka jing koit baroh ki briew ba ïabit jingpang.
Kine ki District ki dei ka Ri-Bhoi District, South West Khasi Hills, East Garo Hills, South Garo Hills bad ka South West Garo Hills.
Ka jylla ka don mynta sa 12 ngut ki briew ba dang don ïa ka jingpang Covid-19 ne ki active case bad ka District kaba dang don bun eh ka dei ka East Jaiñtia Hills, kaba don 3 ngut. Ka East Khasi Hills kaba shah ktah jur tam ka don satang 2 ngut ki nongpang bad iwei napdeng jong ki, i don hapdeng ka jingsumar ha Hospital.
Kat kum ka jingpyntip ka Tnad ka Koit ka Khiah, ki briew ba dang ïabit thymmai ïa ka jingpang kila don satang iwei mynta ka sngi katba iwei i nongpang ila ïoh pat ïa ka jingkoit. Ka jingdon jong kiba ïap ka long 1593 ngut baroh lang.
Haduh 93770 ngut ki briew kila ïabit ïa kane ka jingpang ha kine ki laisnem tam mynta hynrei haduh 92165 kila ïoh pat ïa ka jingkoit.
