Shillong, Ïaiong 04: “Lada phi sngewkhia tang namar i pung dohkha, kaba heh ym tang 25,000 sqft, kumno pat phi tharai ba ngin lah ban pynbeit ïa ka jingïakajia khappud” buh jingkylli u Symbud Myntri Rangbah ka Jylla Bah Prestone Tynsong ïa kiba pyrshah ïa ka MoU bala iasoi hapdeng ka Meghalaya bad Assam.
U Bah Prestone uba dei u Chairman ka Regional Committee ka Ri-Bhoi District, ula ong ba ki paidbah kila shah ïalam bakla haba phai sha ka shnong Maikhuli.
“Ha Maikhuli hi, nga ïathuh ïa phi ba ka lum jingtep ka dei kaba ju pyndonkam da ki beit jong ngi ym palat ïa ka 15-20 snem mynshuwa hynrei ka Assam kala kam trai bad ngim shym la ïoh pyndonkam shuh ïa ka. Ka jingeh jong kane ka lum jingtep kam duna ïa ka 8 acre” ula ïathuh ha ki nongthoh khubor.
“Nga ïathuh ha phi ba ha ka jingleit iuhkjat jong ngi, ka long kaba jynjar bha naba ki don katto katne ki briew ki ba pynpaw ba ki kwah ban don bad ka Meghalaya bad don ruh kiba kwah ban leit noh sha Assam. Dei hadien ka jing bishar kaba bniah bha la iasoi ïa ka MoU hapdeng ka Jylla Assam bad Meghalaya” ula bynrap.
Haba pynpaw ba ka Committee kala leit iuhkjat ha manla ki jaka, u Bah Prestone ula ong “Ngi dei ban sngewthuh ba donkam ban don ka jingia sngewthuh jingmut hapdeng ki ar sorkar bad haba don ka jingïapher jingmut hi, ngi don kam ban shong ban ïakren bad shisien ba ngi la ïakren, kin don beit ki jingpynbeit hangne hangtai namar phim lah ban ong 100% ka dei ha Assam lane 100% ka dei ha Meghalaya”.
U Symbud Myntri Rangbah ula ong ruh “Lada ngim lah satia ban pynbeit ha kane ka kynti, sngewbha bat ïa ka kyntien jong nga ba wat hadien 50 snem, ngam tharai ba ngin lah ban pynbeit ïa kane ka kam”.
Haba pynpaw ïa ka jingsngewnguh ïa u Myntri Rangbah ka Assam bad Meghalaya kiba la nud ban shim ïa ka rai ban pynkut ïa ka jingïakajia ha ki 6 tylli ki jaka, ula ong “Sngewbha wat sngewthuh bakla ïa kane ka jingpynbeit pud, kine ki jingïakhih, ki jingpyrshah kim shym la jia tang ha Meghalaya hynrei wat ha Assam ruh. Katno ki jingkynthoh kila long pyrshah ïa u Myntri Rangbah ka Assam, ki Myntri bad ki MLA ka thaiñ kat haduh mynta mynne na ki briew kiba shong ha kine ki hynriew tylli ki jaka ba ïa kajia”.
“Namar kata, nga kyrpad ïa baroh ki kynhun bapher bapher ba to ngin ïapdiang ïa kawei ka jingshisha bad kata ka jingshisha ka long ba lada ngim lah ban pynbeit mynta, ngam tharai ba ngin lah pynbeit pat hadien habud” ula ong.
Haba ñiew ïa ka jingjia ha Jatalong kum ka kam shimet jong ki arkynhun, u Bah Prestone ula kyrpad ïa ki Seng bhalang ba kin nym pynlong ishu paidbah ïa kane ka kam haba ong “Lada phi ngam jylliew phin sa lah ïa ka jingshisha bad ka jingshisha hi ka dei ka kam shimet”.
“Namar kata, nga kyrpad ïa ka liang jongngi bad na ka Sorkar ruh ba kin nym pynheh ïa kaei kaba la jia namar shen ngin sa sdang noh sa ka bynta kaba ar jong ka jingïakren pynbeit pud sa ha ki hynriew tylli ki jaka ba dang sah jong ka Jylla Meghalaya” ula ong.
