Shillong, Risaw 26: Ki Pulit jong ka Anti Narcotic Task Force ka East Khasi Hills ha ka sngi Balang ki la ïoh kurup haduh 20 song u drok Heroin uba khia kumba 250.64 gram.
U SP(City) u Bah Vivek Syiem u la ïathuh ba ki pulit kiba la ïoh jingtip na ki tnat syntiat ki la leit khynra ïa ka jaka sah jong ki arngut ki briew kiba na ka jylla Assam ha Hotel Serene, Khyndailad ki la ïoh kurup ïa une u drok, ar tylli ki mobile phone, kawei ka laptop, ar tylli ki EPIC bad ar tylli ki PAN Cards na ka Hotel.
Ïa kine ki arngut kiba ki shah kem ha ki pulit uei u dei na Badarpur, Karimganj uba 26 snem ka rta bad uwei pat na Katigorah, Silchar, Cachar, Assam uba 31 snem ka rta bad na ka liang ki pulit ki la register case hapoh ki kyndon ka NDPS Act ha Sardar Police Station.
