Nongpoh, Risaw 25: Ha kawei ka jingjia shah rahbor kawei ka samla kala lait im naka tyrsim sniew jong u Kong Kynsi lajong hadien ba ki pulit ka Ri-Bhoi kila ioh ban pynlait ïaka haka jingpynap shrip ha lad Umsaw hadien ka jingioh jingtip, ba utei u Kong Kynsi, u la rahbor bad thmu lehsniew ïa katei ka samla.
Kat kum ka jingtip bala ioh lum la ïathuh ba katei ka samla (kyrteng la buhrieh noh) ka dang mih na Kynshi, da ka jingthmu ban leit sha Mairang, naka bynta ka jingpule jong ka ha kaba ka la shong da katei ka kali kamai jong utei u briew uba la tip kyrteng kum u Bah Finance Chester Pariong kaba don ïa u number ML 05 U 2717, u ba dei ruh u Kong Kynsi jong katei ka samla, hynrei u tei u rangbah ha ka jaka ban leit sha Mairang u la kit bak ïa kane ka samla da ka ong ban leit sha Shillong bad ïaid pat na ka surok khlaw na Mawmaram ban mih sha Lad Umsaw ha Ri Bhoi District.
Hadien ba katei ka samla kala sngewpher ïa ka rukom ïaid lynti u tei u rangbah da kaba pyndonkam ïa ka surok kaba kynjah bad surok khlaw khlem da ïaid na u surok Mairang sha Shillong, kala pynsuba sniew ïaka rukom ïaid lynti jong u bad da ka jingstad katei ka samla ka la ïoh pyntip sha katto katne ngut ki paralok bad bahaiing halor katei ka jingjia da kaba phah ruh ïaka jaka (location) kaba ka don lyngba ka Whatsapp, kiba la pyntip pat sha ki pulit ka Mairang Police Station bad kumta hi ki pulit ki la pyntip pat sha ki pulit ka Ri- Bhoi bad Umïam Police Station ban buddien ïa katei ka jingjia.
Ki bor pulit ka Umïam Police Station tang mar ïa ioh jingtip halor katei ka jingjia mar mar kila shimkhia ban pynlong ka jing pynap shrip ha Lad Umsaw Ri Bhoi District bad hadien katto katne por ki la ïoh bat ïa kawei ka kali Maruti bad ïoh ban pynlait noh ïa katei ka samla kaba la kynnoh shah rahbor kaba shong ha katei ka kali bad ruh la kem noh ïa u wei u rangbah u ba ñiah ïa katei ka kali bad rah noh sha thanad ban pynlong ka jingtohkit bad hadien ka jingtohkit la aiti noh sha ki pulit ka Mairang Police Station ban leh ïa kaba donkam bad ka jingtohkit ba kham bñiah.
Ha ka jingphla jong katei ka samla, la ong ruh ba u tei u rangbah u la pyrshang ruh ban ktah kti bad leh khlem akor ïa ka ha u surok khlaw na Mawmaram sha Lad Umsaw hynrei kam shym la iohlad ban pan jingïarap namar ba dei u surok khlaw.
