Jowai, Ïaïong 04: Ka lympung ïalehkai phutbol ‘2nd U Adelbert Laloo Memorial Trophy’ 3rd Division Football Tournament 2022 bala pynïaid da ka West Jaiñtia District Sports Association (WJDSA) kaba la long mynta ka sngi 4 tarik u Ïaïong ha madan Kiang Nangbha Stadium Jowai.
Ha ka jingïakhun ba nyngkong la wan ban aireng hapdeng ka Nonglatem pyrshah ïa ka Chyrmang Wah, katba ka kynhun ïalehkai jong ka Nonglatem kala jop da 1-0 kol ïa ka Chyrmang Wah bad ïa katei ka shi kol la theh da u Grouplang Suting ha ka minit ba 25.
Ha ka jingïakhun ba ar hapdeng ka Risingsun Mukhla pyrshah ïa ka Mynso Blazon kala long kaba ïakhait bah namar kitei ki ar kynhun kiba ïakhun dohïap ban theh ïa ki kol hynrei haduh ba kut jong ka jingïakhun kala kut noh da kaba ïakhait da mar shikol 1-1 kol. Ïa ka kol na ka Mynso la theh da u Kermi o Sungoh ha kaminit ba 62 bad na ka liang ka Risingsun u Rimi Pyrtuh ula ïoh ban pynphai ïa ka shi kol ha ka minit ba 73.
Katba ha ka jingïakhun kaba lai pat ka Madankynsaw Mookyndeng kala jop da 1-0 kol ïa ka Newhills bad ïa katei ka shikol la thep da u Dangri Phawa ha ka minit ba kut noh jong ka jingïakhun kata haka minit ba 80+.
Ka jingïakhun lashai ka sngi 5 tarik kan long hapdeng ka Madan Thadmuthlong pyrshah ïa ka Mulang Ialong ha ka por 11 baje mynstep, ka Maitshaphrang Mootyrshiah pyrshah ïa ka Ksehsylle Ialong ha ka por 1 baje nohphai sngi bad ka Lumkhangdong Kyndontuber pyrshah ïa ka Lumchyrmang Mihmyntdu haka por 3 baje janmiet.
