Nga kmen ban bam jadai ha phatok lada nga shah kem tang namar ba ïarap ïa kiba duk : Dasakhiat

Shillong, Risaw 25 : U kyrtong ka NPP na Nongkrem constituency uba dei u Myntri ha ka Sorkar MDA, u Bah Dasakhiatbha Lamare ha ka sngi Nyngkong u la kynnoh ba ki don kiban aireng pyrshah ïa u ha ka elekshon kiba thmu ban phah kem ïa u tang namar ba u ai ïa ki song jingïarap sha ki paidbah ba hap ha Nongkrem constituency.
“Ki don kiba thmu ban phah kem ïanga tang namar ba nga ïarap ïa phi,” la bynrap shuh shuh u Bah Dasakhiat haba kren ha ka jingïalang pynskhem ïa ki nongkitkam ba thymmai jong ka NPP Nongkrem BLock kaba long ha Lad Nongkrem.
Da kaba pynpaw ïa ka jinglyngoh ba ki mih kum kitei ki jingjia, u Bah Dasakhiat ba dei ruh u MLA ka Mawhati u la ong ba ïalade kim lah hynrei lada leh kiwei pat kim kwah. “Lada nga hap ban leit shong jail tang na ka daw ba nga ïarap ïaphi, ai ngan shong bamja dai ngam khuslai,” u la bynrap shuh shuh.
Shuh shuh u ong ruh ba kum ka ïing haba ki ïarap ïano ïano ki ai beit da ka jingsbun mynsiem namar ka jingkyrkhu kaba u Blei u la theh ha ka ïing ka sem jong ki. Nalorkata, u ong ruh ba ka jingïarap kaba ki ai sha ki paidbah kam dei satia ba ki leit ban thied vote kumba la kynnoh hynrei kadei beit ba ki leit ban sam leit ïa ki jingkyrkhu kaba u Blei u la ai ha ka ïing ka sem jong ki.
Utei u kyrtong uba la shah jied ruh kum u President jongka NPP Nongkrem Block, u la ong ruh ba ki don bun bha ki briew kiba riewspah hynrei kim don pat ïa ka mynsiem kaba riewspah ban ai sha kiba donkam ïa ki jingïarap kumba long ka ïing ka em jong u.
U pynpaw ruh kumba ki la lah ban ai jingïarap bad trei ha kine ki snem bad ki bnai ba la dep ki paidbah khlem artatien kin ailad ïa u ban jop kum u nongmihkhmat ba thymmai jong ki.
“Ailad ïa une u samla ba un trei na ka bynta san snem, peit un ai ka jingshakri kaba kumno. namar nga thrang ban ai ka jingshakri kaba janai bad kaban ym kut tang shiteng lynti,”u la bynrap biang.
Ha kane ka sngi, na ka liang ka party ka la pdiang sngewbha ïa bun ki kyrtong kiba ju ïakhun na Nongkrem constituency ha ki snem ba la dep la ka long naduh ka Congress, PDF, HSPDP bad kiwei kiwei.
Ha katei ka jingïalang wat hapdeng ka jingther jong u lapbah ruh ki paidbah kim shym la khih satia hynrei ki la shong bad ap beit haduh ban da wai ka jingïalang.