Shillong, Ïaiong 03: Ka jingsospon jong ka Indian National Congress (INC) ïa ki 5 ngut ki MLA kala pynïohnong mynta ïa ka National Peoples Party (NPP) bad United Democratic Party (UDP) ki ban sa ïohnong mar 50:50 shuwa ban leit sha ka Elekshon Legislative Assembly 2023.
Kat kum ki khubor ba thikna, 4 ngut na ki MLA ba shah sospon ka Congress kin sa leit iasoh sha ka NPP kaba ïalam ïa ka jingsynshar ha Jylla bad ka UDP kaba kyrshan bad ban long ruh ki kyrtong jong kine ki Party ha ka elekshon ban wan.
La ïathuh ba arngut ki MLA kin sa leit iasoh sha ka NPP kiba kynthup ïa i MLA ka East Shillong Constituency kong Ampareen Lyngdoh bad MLA ka Rambrai Constituency Bah Kimfa Marbaniang.
Arngut pat kata u MLA ka Mawlai Constituency Bah Process T. Sawkmie bad MLA ka Nongpoh Constituency Bah Mayralborn Syiem, kin sa leit iasoh sha ka UDP. Tang u MLA ka West Shillong Bah Mohendro Rapsang um pat lah ban tip shano ba un leit iasoh.
Ka Indian National Congress kaba ïoh haduh 20 ngut ki MLA ha ka elekshon 2018, mynta ka kynti kan mih ïakhun ïa ka elekshon 2023 khlem MLA.
Ka khubor ka ïathuh ba ka jingleit iasoh NPP jong u MDC ka Malki-Laitumkhrah Bah Fantin Lakadong, uba dei ruh u kurim jong i Kong Ampareen, bad kumjuh ruh u MDC ka Rambrai-Jyrngam Bah Bajop Pyngrope uba dei u kyn- um trai jong u Bah Kimfa, ka dei ka jingplie lynti ïa kine ki arngut ki MLA ban leit iasoh sha ka NPP bad ban mih aireng ïa ka elekshon 2023 na kane ka seng.
Ka drama saiñ pyrthei kaba jia hapoh ka UDP ha Nongpoh Constituency bad ka jingleit iasoh Congress jyndat jong ka kyrtong 2018 kaba dei ruh ka MDC barim Kong Rona Khymdeit, ka pyni ïa ka jingbym thikna shuh jong u MLA ka Congress ba shah sospon Bah Mayralborn ban ïai neh ha ka Congress. Ka Congress kala dep pynbna ruh ba ka Kong Rona kan long ka kyrtong sha ka elekshon MLA 2023.
Na ki khubor ba ioh lum, la ioh jingtip ba don ruh wat na ki MLA ka Congress ba leit iasoh sha ka All India Trinamool Congress (AITC) ki lah ban kynthih sem biang sha ka UDP ne ka NPP hashuwa jong ka elekshon.
