Shillong, Ïaiong 03 : Da ka jingthrang ban ïohi ba ki skul kiba don ha ka constituency ki dei kiba bha bad kiba shngain, u MLA ka Mylliem ba dei ruh u Myntri ka tnad C&RD, Bah Hamlet Dohling u la ong ba u la pynlut haduh 1,34,92,300 tyngka (1.34 klur) tyngka na ka skim MLA tad haduh mynta tang na ka bynta ban pynkha kamra klas thymmai ha ki skul kiba don ha ka constituency.
Ïa kane u MLA u la pyntip ha ka jingïalang kaba long ha Mawklot Presbyterian Secondary School kaba u la pynïoh 5,00,000 tyngka na ka bynta ban pynkha kamra klas thymmai ha katei ka skul. Ha kane ka sngi u MLA u la ai sngewbha ruh kawei ka xerox machine na ka bynta ka jingdonkam jong katei ka skul.
“Katba lah ngan kyrshan ïa ki skul kiba don ha constituency bad kat haduh mynta nga la pynlut haduh 1.34 klur tyngka na ka skim SRWP tang ban pynkha ïa ki kamra klas (additional class room) namar nga ngeit ba ki skul ki long ka bynta kaba khraw ban pynnang pynstad bad hikai ïa ka akor ka burom jong ki khun ki kti,” u la ong.
Ha kane ka sngi la donlang ruh u Pastor B.I Kharir ba dei u President jong ka Managing Committee ba pynïaid ïa ka jingïalang, nangta u Rev. BG Mylliem Umlong Pastor I/C, ki Tymmen Basan ka Balang, Rangbah Shnong, Secretary Shnong Mawklot, ki nonghikai bad ki khynnah skul.
Ha kane ka sngi, u Bah Hamlet ula pyntip ruh ba la ïoh ban mang tyngka 10 lak tyngka na ka bynta ban shna ïa ka Homiwell School kaba don ha Mawklot hi.
