Shillong, Ïaiong 03 : Ka Mylliem bad ka Nongkrem constituency ki dei ki ar tylli ki constituency kiban shongshit bha ha ka elekshon MLA kaban sa long ha u 2023 namar ka jingïakhun kan long beit para nongmihkhmat ba don ha ka bor.
Tangba ym lah ruh ban len ba ka Khliehriat constituency kadei sa kawei pat ka constituency ba ki paidbah ka thaiñ kin sakhi ia ka elekshon kaba kham pher ha kane ka kynti hadien ba u MLA bad Myntri barim ka sorkar jylla, Bah Nehlang Lyngdoh u la wanphai biang sha ka saiñpyrthei.
Lada phai shwa sha ka Mylliem constituency, ki kyrtong kiba la pyntikna ban aireng ki kynthup ïa arngut ki MDC kata u MDC ka Mylliem Bah Ronnie V Lyngdoh, MDC ka Laban – Mawprem, Bah Mitchel Wankhar bad u MLA ba mynta ba dei ruh u Myntri ka tnad C&RD, Bah Hamletson Dohling.
Ka lah ban dei tang kane ka constituency ha baroh kawei ka jylla ba ki don haduh lai ngut ki nongmihkhmat paidbah kiba mih ban ïakhun ban knieh ïa ka jingjop.
Lada phadien khyndiat, u Bah Ronnie V Lyngdoh MLA barim ka Mylliem bad uba la bat teng ruh ïa ka shuki Myntri u shah rem noh tang khyndiat spah vote ha u 2018 ha u Bah Hamlet Dohling. Hynrei haba la poi pat ha ka elekshon MDC ha u 2019, u Bah Ronnie u la ïoh ban tam palat hajar vote ïa ka kyrtong ba pynieng da u MLA ka Mylliem.
Kaban pynkulmar pat mynta kadei da ka jingmih jong u Bah Mitchel, namar ka shnong Lawsohtun kaba ma u, u khlaiñ bha ha ka elekshon MDC ka hap pat ha Mylliem ha ka elekshon MLA.
Tangba kawei pat kaba pynsahnud ia ki nongthep vote ka long la kitei baroh lai ngut ki kyrtong kiba paw ha khmat kin iakhun na ka tiket aiu ha kane ka elekshon ban wan. Hato u Bah Hamlet un iakhun biang na ka PDF, hato u Bah Mitchel un iakhun na ka tiket NPP kaba u jop ha ka elekshon MDC bad ruh la u Bah Ronnie un iakhun biang na ka Congress?
Ha Nongkrem pat ka jingpynbna jong u Myntri ka tnad Transport ka jylla ba dei ruh u MLA ka Mawhati, Bah Dasakhiat Lamare ban leit ïakhun noh sha katei ka constituency ka la pynshongshit bha ïa ka lyer elekshon. Da ka jingwan jong u, ka jingïakhun mynta ka kynti kan dei beit bad u MLA ba mynta Bah Lambor Malngiang ba dei ruh u Chairman barim ka State Planning Board bad ruh ïa u MLA barim ka Nongkrem, Bah Ardent Miller Basaïawmoit ba dei ruh u Chairman ka VPP.
Kane ka constituency ruh kan dei kaba shongshit bha ha ka elekshon MLA kaban sa long shen bad kane ruh kadei ka por kaba biang bha ïa ki paidbah ban bishar sani bha ïano ba kin jied.
Haba phai pat sha ka Khliehriat, katei ka thaiñ kaba mihkhmat mynta da u MLA ka UDP, Bah Kyrmen Shylla kadei ka constituency kaba la shongshit naduh mynta naduh ka sngi ba u Bah Nehlang u la pyntikna ba un mih ban aireng na ka tiket NPP. Khlem artatien ka jingiakhun kan long kaba itynnad bha namar baroh ar tylli ki party ki dei kiba don ha ka bor synshar ha kane ka sorkar jylla ba mynta.
