Shillong, Iaiong 3 : Ka Federation of All School Teachers of Meghalaya (FASTOM) ka la rai mynta ka sngi ba wat la ki sngewthuh ba ka sorkar kam lah ban kyntiew kyrdan ïa ki adhoc sha ka Deficit hynrei ka sorkar ka dei ban ai da ka jignthoh ba kala mynjur ban kyntiew tulop 18000 tyngka bad ban pynkiew beit man la u snem 5 % kumta katba kim pat ïoh ïa kane kin dang ïai bteng beit ïaki jingïakhih.
Na ka liang u nongpathai khubor ka FASTOM u bah Mayborn Lyngdoh ula ong “ Ngin ym sangeh katba ngim pat ïoh da ka jingthoh na ka sorkar”.
Lah ban pynkynmaw ba ha ka 23 tarik Lber u Myntri ka tnad pule puthi u ma Lahkmen Rymbui ula ong ba ym lah sastia ba kyntiew kyrdan ïa ki nonghikai Adhoc sha ka Deficit hynrei ka sorkar ka kloi ban kyntiew ïa ka tulop jongki bad halor kane ka sorkar ka dang pynkhreh nadong shadong katno hap ban pynlut ban kyntiew ïa kane ka tulop. “ Ngin sa ïathuh ïaphi tang shu la dep lut nadong shadong” ong u ma Lahkmen ïa ki nonghikai.
U bah Lyngdoh ula ïathuh ba naduh ka 18 tarik Kyllalyngkot 2022 ki nonghikai ki la ïa kynduh ia u Director of School Education and Literacy u Ambrose Ch Marak bad la dep ai jingthoh sha u halor ka jingkyntiew tulop kumba la bthah da ka sorkar.
