Shillong, Ïaïong, 3: Ka National Commission for Women (NCW) ha ka sngi Thohdieng ka la pynkha ïa ka Anti-Human Trafficking Cell na ka bynta ban ïakhun thma pyrshah ïa ka jingshah khaii ki briew, ban pynjur ïa ka jingpynshai halor ka hok ki kynthei bad ki khynnah bad ban ai jinghikai ïa ki Anti Trafficking Units bad ban kham ïoh ka jingshahskhor na ki bor jong ka aiñ.
Ïa kane ka Cell la pynkha da ka jingthmu ban pynshai kham bniah sha ki ophisar ka tnat Pulit. Ka Cell kan sa pynlong ïa ka Gender Sensitization Trainings bad ïa ki jingïathir nia ha kaba kumno ki Pulit kin ïakhun ïa ka jingshah khaii jong ki briew ha kaba yn sa pynlong ha ki jylla bad ha ki District.
Ïa ki ujor ba ïadei bad ka jingshah khaii jong ki briew yn sa pdiang da ka Commission bad yn sa bishar da kane ka Cell.
Ka Commission kaba la peitngor ka lap ba ka duna bha ka jingai jingïarap ïa ki lanot bad khamtam ïa ki bahaing hasem jong ki lanot.
Namarkata, ka Cell kan sa peitngor ïa ka rukom treikam bad kan pynshlur ïa ki shnat treikam jong ka sorkar ha kaba ïadei bad ka jingshim ïa ki lad ki lynti ban ïada na ka jingkhaii ïa ki briew bad ban ai jingïarap ïa ki lanot.
Ka Cell kan sa ïarap ïa ki lanot ba kin dup lah ban ïoh biang ïa ka jingim kaba thymmai da kaba ïarap da ki kynja ai jinghikai pyntbit.
